Ахъушала урга даражала цаибил школала директор ва илаб бузути мугIяллимти цархIилтас гIибратли бетарули саби ва баркаллаличи лайикьбикили саби дявила хасси балбуцла бутIакьянчибас гIяхI­баркьла кумек бурхьнила ва бу­чIантас патриот бяркъ бедлугнила шай­­чиб. Иличирли дурхIназир биш­тIа­ли лебай ВатIайчи диги адил­кьули са­ри.
Школализир бегIтала кумекличил СВО-ла бутIакьянчибас хIяжатдиркути секIал дурчули сари, илдачил ва илдала гIямрула бархкьябачил гьунибаъниби дурадуркIули сари, бучIантани «Ургъанничи кагъар» бикIуси балбуц бетурхахъули, бургъанти уркIичеббарес кагъурти дурхьули сари. Педагогунани дурадуркIути «Разговоры о важном» бикIути ихтилатуназиб СВО-ла бутIакьянчибачила, илдала гъабзадешличила, «Герой из соседней улицы» бикIути ва цархIилтира темаби ахъдурцули сари.
«Окопная свеча» бикIуси балбуцла дазурбазир, мугIяллимтачил барх бучIантанира бутIакьяндеш дирули сари ва бургъантас хIяжатдиркути секIал хIядурдирули сари. Илкьяйдали 8-11-ибти классунала бучIантала СВО-ла ветерантачил гьунибаъниби детурхули сари.
Арбякьунси дуслизиб Дагъистай­зибси «Народное ополчение 1999г. Интер­бригада» бикIуси жамигIятла ор­ганизацияла Председатель МутIалим МутIалимовли Ахъушала районнизи архIя дураберкIибхIели, лебилра районна халкьлис, Ахъушала цаибил школала директор Сабият МяхIяммадовас ва мугIяллимтас СВО-ла бургъантас кумек гIеббиахънилис баркалла багьахъурсири.
МутIалим МутIалимовли Ахъушала цаибил школала директор, дахъал дусмазиб хIялалси хIянчи барибси, сунела гIямру дурхIнас хасдарибси Сабият МяхIяммадова, нешла мезла ва литературала дурсри кадирхьуси, пагьмучерси мугIяллим Майя ГIялиева ва бяркъла шайчирси директорла насихIятчи, мугIяллим Рукьият АрслангIялиева «Чеаабиуси наслулис патриот бяркъ бедлугнилис» бикIути Баркаллала кагъуртачил ва медальтачил шабагъатлабариб.
Илкьяйдали леб СВО-ла бутIа­кьян­чибас кумекуни дурхьули ва баркаллаличи лайикьбиркути МухIела, ХIинтIала, Бутрила, Усишала, ХIерхмахьила ва цархIилтира шимазибра мугIяллимти, бучIанти, шимала бурги ва цархIилти адамтира. Илдани бургъантас дявила авлахъличир бегIлара гьалар гIягIнидиркути секIал, берк-бержла продуктуни, шинни ди­цIиб­ти тIакьни, умудеш гIеббурцути гIягI­­ниахълуми, ванати палтар, дабруми, дармунти, бурушуни, гIядиялти дур­хьули сари.
Ил­ди анцIбукьунира жяв-жявли ахирличи дикахъили, лебилра бургъан­ти чула бегIтачи, гъамтачи, дурхI­на­чи чарбухъахъес кьадарбиахъаб Аллагьли!