Ахъушала районна АметеркIмахьилизирадси ГIябидова УмахIябидат МяхIяммадхIяжиевнани дахъал дусмазиб сари акIубси шилизибси урга даражала школализиб хIянчи барили сари.

1973 ибил дуслизир АметеркIмахьила школализир гехIел класс тамандарили, ТIебекмахьила урга даражала школализи белчIуди даимбарес шуррухъун­сири ил. Гьар бархIи ил Аметер­кIмахьилизирад ТIебек­махьлизи хьурали рашусири. Илини 1975 ибил дуслизиб школа хъараахъурсири. 1976 ибил дуслизир ил Дагъиста пачалихъла университетлизи филологияла факультетла урус мезла ва дагъиста мезанала отделениелизи карерхур.

ЧебяхIси даражала багьуди касили гIергъи УмахIябидат АметеркIмахьила школализир пионервожатаяли рузули, сунела бузерила гьуни бехIбихьиб. Ил школализир нешла мезла ва литературала дурсри кадирхьули иш­бар­хIиличи бикайчи рузули сари.

УмахIябидатли бузерила стаж 49 дусличи абиркули саби. ДурхIнас ва илдала бегIтас дигуси педагогли дахъал дусмазиб хIянчи барили, шила халкьла, сунечил барх бузутала халаси хIурмат сархили сари. «Паргъатси, пагьмучерси, мурхьси, халаси багьудила регI учительница сари, сунела санигIят ункъли бяркъурси», – бикIули саби ил ра­лути иличила.

Сунени бучIахъути дурхI­нази кабирхьуси дарсличи, нешла мезличи диги ва иштяхI имцIадиахъес къайгъилизир рузули сари УмахIябидат.

Илини сунела гIямрула вархкьячил хIябал рурси абикьурли, гIяхIси бяркъра бедили, багьудира касахъили, гIямрула гьунчи дураили сари. Гьанна рурсбачибад акIубтас гIяхIси бяркъра бедес, чебяхIси багьудира касахъес къайгъилизир сари. Ца рурсила уршили Дагъиста пединститутла филологияла факультет таманбарили, учительли узули сай, ца рурсила урши гехIел дус мадрасализив учIули сай, ца урши спортивный кол­леджлизи учIес керхурли сай.

УмахIябидат ГIябидова «Ахъушала район» МО-ла администрацияла, багьудила управлениела ва школала шайзирад чуйнара ХIурматла Грамотабачил, Дипломтачил шабагъатларарили сари.

Гьалабван Ахъушала ши­ли­зибси культурала КIял­гIялизиб бетерхурси кон­ференцияличир ил «Ахъу­шала район» МО-ла ад­министрацияла шай­зирад, су­нени касибси сани­гIят­лис марли дахъал дус­ма­зиб хIялалси бузери барни ба­гьандан, ХIур­матла Гра­мо­таличил шабагъат­лара­риб. Ума­хIябидатли бучIа­хъути дурхI­нани олим­пиа­да­ба­чир гьаларти мерани дурцни багьан­дан, ба­гьудила Управ­ле­ниела ва школала шайзирад ХIур­матла Гра­мотабачи лайикьрикили са­ри.

Гьаннала гIергъира сунела бузерилизир ва гIямрулизир сархибдешуни имцIадикIаб, сунела дигутани разирирули хIерриэс кьадарбиаб!

 

С.ГIябдуллаева