Ишдус хъулри лушанна БархIи августла 10-личиб бетарули саби. БегI гьалаб СССР-лизиб ил бархIи байрамван дураберкIибсири 1956 ибил дусла августла 12-личиб, августла кIиибил алхIят бархIи. Нушала улкализиб итхIейчибад бехIбихьили, августла кIиибил алхIят бархIи хъулри лушанна БархIилизи халбируси саби.
Ил бархIила шадлихъличир сунечи лайикьдикибти байрамла далдуцунира дурадуркIути сари. Концертунира чедиахъути сари. Хъулри лушнила шайчиб бузути хIянчизарти хала хIякимтани чула БархIиличил мубаракбирути саби, илдас жура-журала шабагъатунира лугути сари. Ил бархIи дузесиути сари сагали тIашдатурти юртани, паркани, фантанти, гьундури…
Дила гIямрулизив ну кIина хъулри лушанна БархIилис хасдарибти шадлихъуначив къаршиикибсира. Гьаланачив Москвалис гьарахъли ахIенси Чемодурово бикIуси шилизив, студентунала строительный отрядлизив.
1976 ибил дуслизив Москвала строительный институтлизиб бучIути дила кIелра биштIати узбачи шадив вякьунси наб бегIлара виштIаси узи СягIидличил ва иличил барх бучIутачил Москвала удибси ца совхозла кьулала фермализир юртани тIашдалтес чебуркъубсири. ХIера, илхIели бегI гьалаб нуни хъулри лушанна БархIиличила бакьибсири. Ил августла кIиибил алхIят бархIи сабри.
Нушала стройотрядла командир гIясатин Эрик Агаев сайри. Ит бархIи, нуша дузуси совхозлизибад асили жагьил хIяйван, гIясатинтала ва дагъистанлантала дахъал журала хурегуни хIядурдарибтири. Наб гьанбиркур нушачил бузути урусла дурхIнасра илди гIяхIдизурли.
КIиэсил яргалис юртани лушанна БархIилис хасбарибси байрамличив ну Арменияла Ленинакан (гьанна Гюмри) шагьарлизив къаршиикибсири. Ила ну 1989 ибил дусла дуцIрумлизив вякьунсири. Мерсли буунси Ленинакан шагьарлизи, гъятIдиибти школабала мерличир сагати школаби тIашдатес. Дагъистайзибад ила хъулри тIашдалтуси поезд (СМП) «Дагстрой» бархьибсири. Илала начальник дила узи СягIид сайри. Школализир каникулти сарри. ДуцIрумла замана ну СягIидли, циила дила хъалибаргла бюджет гIяхIбухъахъес или, ила арукибсири. Илабра хъулри лушанна БархIи байрамван дураберкIили гьанбиркур наб…
Дила биштIаси шилизибад бахъал чебяхIси даражала багьуди касибти хъулри лушанти дурабухъунти саби. Дибгашантазивад бегI гьалаб, Куйбышевла уличилси Москвала инженерно-строительный институт (МИСИ) таманаили, юртани лушанна санигIят касибси саби Дагъиста урибси строитель дила узи МяхIяммад Ражабовли. Илис гIергъи, Дагъиста урибси строитель нушала виштIасигъуна узи СягIидлира ил институт таманаибси саби. ГIур – нушала рузикьарла урши Хасбулат Абакаровлира (Дагъиста урибси строитель) ва узикьарла урши Хасбулат Хасбулатовлира. Илдас гIергъи – унра ши Кьялкнибадти ГIяхIмад Варачановли ва узби Жалил ва ГIябдулкьадир Акаевхъалани. Унра Иракьила шилизивадси МяхIяммадзапир ХIяжиевлира ил институт таманаибси саби. Сулахъла чяхIила (каскадла) директорла заместитель Жалил Акаев биалли – РФ-ла урибси гидроэнергетикла уличи лайикьикибси сай.
Дагъиста политехнический институт (гьанна технический университет) таманаили хъулри лушанна санигIят касибти хIурматла адамтира лебти саби дила шанти. Илди саби МяхIяммадимин ГIялиев (РФ-ла урибси строитель), Ибрагьим БяхIяммадов, Султанбек Ражабов (Дагъиста урибси строитель), илала урши Рустам, дила урши Ражаб, Ибрагьим Чупанов ва цархIилтира. Лебилра ца макьалализиб гьанбушесра хIейрар, гIяйибмабиридая.
Нушала шилизиб, чула хасси багьуди агартира, бахъал хъулри тIашдалтанти устни бирутири, лацла, кьисла устни ва прорабли бузули калунти. Ишав гьанхIевшес цугхIебиркур учительла санигIятла вегI Дагъиста урибси строитель, дила гъамси юлдаш МяхIяммад ХIяжибяхIяммадов. Илини МяхIячкъалализир чумал дахъал хъулрала дегIти юртани тIашдатурти сари.
Нуни илди цацабехIтачила нушала газетализи макьалаби делкIунти сари.
Гьанна лукIуси макьалала игит дила шан ва унра, ДР-ла урибси строительла уличилси Султанбек МяхIяммадович Ражабов сай. Нуни балуси саби илала документуни РФ-ла урибси строительла уличира гьаладихьниличила. Белики иш челябкьуси хъулри лушанна БархIилис нушаб Султанбек МяхIяммадович гьатIира ахъси хIурматла уличил мубаракварес чебуркъес. Илала «ВатIа гьаларти сархибдешуни багьандан» бикIуси кIиибил даражала орденра лебси саби.
Султанбек МяхIяммадович Ражабов акIубси сай 1957 ибил дусла июньна 20-личив Дахадаевла районна Дибгашила шилизив, мазала хала букIун хIурматла МяхIяммад Ражабовла хъалибарглизив. 1975 ибил дуслизиб Дибгашила урга даражала школа таманаибси Султанбек Ленинградлизи шила хозяйствола институтлизи учIес керхес вякьунсири. ИмтихIянтачир сархибти баллани камли диъни багьандан, ил институтлизи хIевцибсири. Султанбек, Дагъистайзи чарухъи, Дибгашила мякьлабси Кьялкнила школализи пионервожатыйла хIянчиличи кайибсири.
1976-1978-ибти дусмазиб Султанбекли гIярмияла къяяназиб къуллукъбарибсири, Москвала горнизоннизиб. 1976 ибил дуслизив студентунала строительный отрядлизивад чарулхъуси ну Жуковский шагьарлизи гIярмиялизиб къуллукъбируси дила шан уршиличи гIяхIладли вякьунсири. Дебали разивиубсири Султанбекла дудеш Герман МяхIяммад, нуни сунела урши-гIярмицла юлдашунала ургаб сархибси хIурматличила бурибхIели.
ГIярмиялизиб къуллукъбарили чарухъунси Султанбек Дагъиста политехнический институтла имтихIянтачи хIядурбирахъуси (подготовительное) отделениелизи учIес керхур. 1979-1984-ибти дусмазив Султанбек Ражабов Дагестанский политехнический институтлизив (гьанна ДГТУ) учIусири.
Султанбек МяхIяммадовичла бузерила гьуни 1982 ибил дусличибад бехIбихьибси саби. Дагъиста политехнический институтлизив учIули левалли, ил ДУС-ла СМУ-8-личив хIянчиличив узес вехIихьибсири, сагали тIашбалтуси Дагъиста мединститутла юртлис къараулдеш дирули.
1984 ибил дуслизив институт таманаибси Султанбек Ражабов лерилра Северный Кавказла республикабазир юртани тIашдалтуси «Ставропольстрой» трестлизи хIянчиличи вархьибсири. Къизилюртлизибси компрессорная станция илала хIянчила цаибил объектли бетаур. Илав ил старший инженерли узусири.
1986-1988-ибти дусмазив Султанбек МяхIяммадович «Ставропольгражданстрой» бикIуси спецуправлениелизив прорабли узули калун. ИлхIели илини ЦIудара урхьула дублабси, 1898 ибил дуслизиб тIашбатурси «Кавказла Ривьера» санаторий тамай сагабарибсири (капремонт). Ил санаторийлизиб ЧебяхIси ВатIа дергъла чулахъунани чула арадеш ункъбирахъусири. Ил Султанбекла кIиибил объект сабри.
Сунела бегIти декIли зягIипбикниличибли, нушала Султанбеклис Дагъистайзи чарухъес чебуркъубсири. Гьаланачив ил «Даггражданстройлизив» прорабли узиб. 1989 ибил дусла бехIбихьудлизив СМП «Дагстройлизив» участокла начальникли узес вехIихьиб. ГIур илав старший прорабли.
Лебтанилра балуливан, 1988 ибил дусла декабрьличир Армениялизир халаси балагьла мерсдакьунтири. Ил узиси республикала шими-шагьурти гъятIбиълумачи шурдухъунтири. 25 азир адам гъятIбиълумауб алхунтири. ИлхIели СССР-ла Правительствола ХIукму хIясибли, нушала чебяхIси улкала дахъал мер-мусаличибад Армениялис кумекбарес хъулри тIашдалтанти музабухъунтири. 1989 ибил дуслизиб Дагъиста АССР-ла Правительствола ХIукму хIясибли акIахъубси СМП «Дагстрой»-ла хIянчизартира Арменияла Ленинакан шагьарлизи бархьиб. Илдани илар Дагъистан Республикала харжаначир кIел халати школа тIашдатур. ИлхIели илав старший прорабли вируси Султанбек Ражабовли, хIяжатдеш ахъалри, гIядатла ялчила ва шофёрла хIянчира дузахъутири.
СМП «Дагстройлизив» узуси Султанбек МяхIяммадович, санигIятла устадеш ва сунечи хъарбарибси хIянчилис жавабкардеш дихес бални багьандан, Дагъиста Правительствола ХIурматла Грамоталичил ва арцличил шабагъатлаварибсири.
1991 ибил дуслизив Армениялизивад чарухъунси Султанбек Ражабовли нушала республикализиб бегI гьалаб биштIаси дахъал кьялубар предприятие «Южный» акIахъубсири. 1991-1994-ибти дусмазиб СМП «Дагстройла» бухIнаб предприятие «Южный» сагали тIашбалтуси «Адам-Интернейшл» комплексла субподрядчикли бирусири. Адам-Интернейшл» комплекслизи кадурхутири илар тIашдатес гIягIнити юртани: администрацияла офисли биэс гIягIниси кIел дерхIла юрт, цархIилтачил бархбас бузахъуси кIел дерхIла цагьатIи юрт (узел связи), 480 адам кабиэс бируси столовая, медсанчасть, гIяхIлала хъали (гостиница) ва цархIилти.
1995 ибил дуслизив Султанбек Ражабов МяхIячкъалала Урхьула портлизи строительный участокла начальникла хIянчиличи шурватурсири. Султанбек МяхIяммадовичла бекIдешлиуб камси заманала духIнар иларра дахъал гIягIнити юртани тIашдатуртири.
ОАО «Каспийгазпромлизив» подрядчикли узухIели, Султанбек Ражабовла къайгъиличил Дахадаевла районнизиб 30 метрла ахъси антенная опора тIашбатурсири. Султанбекли гьала-гьуни бурцути ва хатIаби агарти хIясилти гьаладирхьутири Каспи урхьула дублар Ачисулизир гостиницала юртани тIашдалтухIелира.
Султанбек МяхIяммадович Ражабов 2004-ибил дусличивад бусягIятла заманаличи бикайчи ООО СП «Южный»-ла директорли узули сай. Илала санигIятлашалси устадешличибли организацияли хIянчи заманаличир, ахъси даражаличил тамандирути сари. Ил багьандан Султанбекли бекIдеш дируси коллектив хIянчи агарли кавлуси ахIен. Султанбек спортличилра гьалмагъикибси адам сай.
Илала кIел рурсира ца уршира леб. Урши Рустам Султанбекович МяхIячкъалала «Водоканалла» директор сай.
Нуни Султанбек виштIахIейчивадал валуси сай. Шилизир нушала бегIтала юртани мякьлар дирутири. Нуша кIилалра дудешуни Дибгашила Кировла уличилси колхозла хала букIуни бирутири. Султанбекла халати узби ХIяжи ва МяхIяммад дила юлдашуни сабри. Дила юлдаш сай илала узи Ражабра. ХIурматла адам сай Ражаб МяхIяммадович. Ил 10 дус Дахадаевла районна КПСС-ла цаибил секретарьли ва 8 дус районна администрацияла бекIли узули калунси сай.
Сунени бирусиличи чекайзурли узуси адам сай илала виштIаси узи Султанбекра. Наб ил гIямрулизив имцIали къаршииркниличибли нуни илала бузериличила балуси саби.
Ил Кьялкнила школализив пионервожатый вирухIели, ну илав урус мезла учительли узусири. Савли нуша кIелра дарх хIянчиличи дашутири. КIел баз Ленинаканнизив бетон калкьуси гIядатла хIянчизарли узуси дила Султанбек начальникли вирусири. СМП «Дагстройла» начальникли узуси дила виштIаси узи СягIидла ил гъамси юлдаш сайри. БусягIятра нуша имцIали къаршидиркутира.
Лебилра строительти–дибгашанти, илдала лугIилизив Султанбекра, нуни хъулри лушанна БархIиличил мубаракбирулра. Нуни илдас ва илдала хъалибаргунас чIумаси арадеш ва гIямрулизиб талихI булгулра.
ХIяжимурад Ражабов
