Сергокъалала районна ГI.ГI. Тахо-Годила уличилси ХIурхъила урга даражала школала ручIан Камила СягIидовани «БелчIудилизир диахъубти сархибдешунас» бикIуси медаль сархиб ва хIунтIена аттестатличил школа таманбариб.
РиштIахIейчирад Камила ункъли ручIусири. Гьаннара илини, сунени чердикIибти ЕГЭ-бира дедили, школа таманбариб.
Камилани республикала, районна ва лебил Россияла даражаличир дурадуркIути олимпиадабачир, абзаначир мурталра бутIакьяндеш дири ва гьаларти мерани кайси. Илис бикьрили детарули сари Камилала грамотаби ва дипломти. Илди-ургар лер: халкьани-ургабси суратунала «Мисс осень» бикIуси конкурсличир бутIакьяндеш дарнилис бедибси 1-ибил бутIала диплом, лебил Россияла «Умнотворец» бикIуси конкурсличиб касибси цаэсил мерлис бедибси диплом, школала край руркънила шайчиб дураберкIибси конкурсличиб ва «Детство без границ» бикIуси халкьани-ургабси мажлисличиб касибти 2-эсти меранас дедибти грамотаби, муниципалитетли дурадеркIибти олимпиадабачир гьаларти мерани сархнилис дедибти дипломти, грамотаби ва Баркаллала кагъурти.
Илдигъунти бучIантани, ХIурхъила урга даражала школала багьудила бягIуси гьуни даимбирули саби. Лебтанилра балуливан, ил школала мякьи мурхьли ардякьи сари республикала ва улкала тарихлизи. ЦацадехIти дурала улкназибра, дебали бахъал гIялимти, профессорти, гIилмула хIянчизарти сунезибад дурабухъунси школа кьяйда ил машгьурбиубси саби.
Илкьяйдали гьалабяхI башули, сархибдешунала кьани чебирцIахъули, рухIла давла ва тарих давлачердирахъули даршдусмазибра калахъес чIумаси арадеш ва бузерилизиб гьамаддеш дулгулра ХIурхъила урга даражала школала мугIяллимтас.
