Гьалабван аргъибси ТАСС-ла багьахънили дебали уркIи разибариб. Илаб 2024 ибил дусличи бикайчи Дагъистанна мер-мусаличир сагати 20 школа тIашдалта или бурули саби.

Валлагьра гIяхIси хабар саби. Школаби тIашдатес Дагъистаннизиб чараагарли гIягIнили саби.
Дебали халаси кумек бетаур, дила ур­ши­ла хъалибарглис ва МяхIячкъалала «Паль­мира» бикIуси посёлоклизир хIер­ди­ру­ти хъалибаргунас, сагаси школа тIаш­ба­тур­хIели.
Илаб хIербирути лебилра халкьра, илдачил рарх нура, баркалла рикIулра школа барес кумекбарибти лебилра адамтас.
Халаси къиян кабихьили хIербиэс юртани тIашдатурли, мякьлаб школа агархIели, дурхIни гьарахъли шагьарлизи бучIахъес бикес чебиркулри, илар дахъал къияндешуни алкIулри.
Гьанна кIялгIяван жагаси сагаси школализиб биэс гIягIнитачибра имцIали дурхIни бучIули саби. Пикрибаралли, класслизи кабиибти хIябцIали-авцIали дурхIялис ца учительницани багьуди бедес гьамадли ахIен. ДурхIначи хIеруди чебетхIебаили, сяйси даражаличилси багьудиличил ба­хъал дурхIни халабиули саби. Багьуди агарси наслу халабаъниличибра халаси балагь улкаличи хIякьян. Вархьсири Владимир Ильич Ленин, — «ДучIеная дучIеная ва гIурра дучIеная» — викIухIели. Лерилра цIакьани дяхIчиаили дучIеная бикIуси тIалаб, дунъяличиб бегIлара умуси ва бархьси, бусурман диннизибра леб.
Дагъистан мурталра багьудичебти адамтачи пахрума биркьуси улка бирусири. Итди балагьла 90 ибти дусмани халкьлис бекIдеш дарахъес цIакь лебти, багьуди агарти адамти кабатур. Ил багьандан саби улка чебсакIес хIебируси, халаси давлаличил мискинни хIербируси.
Ца игъбарлисван, МяхIяммадгIяли Мя­хIям­мадовла гIякьлула халадешли, Аллагьлизи булгути адамтала балгнира кьабулдариб дургар, дургъбази гъудурхIебарили Дагъистан калун.
Халкьла саби акIес бажардила халадешли, илди хIербирути мер-мусаличи хIукуматла гIяхIдешуни гIердаэс дирули ахIен. ХутIличил, газличил, шинничил, канализацияличил халкь дигуливан гIеббуцес бетарули ахIен. ГIердиули ахIен къирли дуцибти гьундури, школаби, дурхIнала унхъри, хIянчила мерани.
ХIялалли хIянчи бирусилис, гьанналауб барибтас азир баркалла биаб халкьла шайзибад, амма дарес чараагарти гIурра дахъал секIал кали сари.
Республикала БекI Сергей Меликовли­чибад бехIбихьили, Правительствола Пред­­седатель Абумуслим Абумуслимов­ли­­чибад лебилра гьуни чебиахъути хIян­чизартачи баайчи цIакьани кIирка-хIяб­ка­­дарили, чекабизурли бузес чебиркур. Ил­дас бусягIятла замана Дагъистанна та­рих­лизиб чебяхIти адамтиван саби гьанбур­шу­ли калесли бузес, лайикьти шуртIри акIа­хъубли сари. Нушачир дахъ-дахъал хIян­чи, илдала уркIи кабихьибси бузериличи хIерли сари.
ХIябал сменализиб дурхIни хIебу­чIа­хъес багьандан, пикрибарили саби Дагъистаннизир сагати 20 школа тIаш­да­тес. Нушала Правительствола Пред­седатель Абумуслим Абумуслимовли, хIя­бал дусла бухIнаб, 50 азир школализиб бучIути дурхIни имцIабиубли саби или бурули сай. ГIяхIси хабар саби, Аллагьли лебилра арали халабаахъаб.
Дагъистанна багьудила Министрла къул­лукъуни заманалис дузахъуси ЯхIъя Бучаевли буриливан, тIашдалтути 20 школализирад 10 — МяхIячкъалализир, кIел — Каспийсклизир, ца — Лавашала районнизиб, цархIилти республикала районтазир тIашдалта.
Дахъал хIянчи лер ЯхIъя Бучаевлис ва илгъунти цархIилтира гьуни чебиахъути хIянчизартас, Дагъистанна халкьла гIямру лайикьси даражаличир диахъес багьандан, бекIдарес чараагарти.
Илди лерилра ВРИО-хъали тамандиубли, хIянчи балути ва бирути адамти лерилра мераначи баахъа Аллагь или газета бучIанти булгахъес гьалабирхьулра. ЦархIил бареси халкьли балули ахIен.
Гьамадли ахIен лебил халкьла яшавличи, гIямруличи къячдилкути масъултас жавабкардеш дихули бузутас. Амма гьарил барибси секIал халкьли кьиматлахIебарили кахIевлан. Дила пикрили, хIялалли барибси хIянчилизиб саби гьарилла гIямрула мягIнара.
Халкь багьандан бузахъес жавабла хIянчизартас Аллагьла кумекра, чархла арадешра, бузерилизир гьарбизунира дулгулра.