Гьарли-марси литература тарихла бикьри саби. Илала декIар-декIарти журабазир гIям­рула анцI­букьуни чуласун хIисаб­ди­рули сари. Мурхьли ва тIинтIли тарих багьес кумек­дирар литературала произведениеби. Ил шайчир Дагъиста халкьла писатель Расул БяхIям­ма­довла белкIани цархIилти лукIанталайзирад гIяхI­цадла де­кIардулхъули сари, хаслира илала очеркуни ва гIергъити дусмазир делкIунти гьанбикуни.

Фольклорист сайливан, Р.БяхIям­ма­довли сунени дучибти даргала халкьла мухIлила пагьмула произведениебала чу­мал жуз дураиб: «Даимси лами», «Дар­гала халкьла хабурти», «Даргала халкьла пагьмула зурхIяб», «УркIила тимхъ». Сай-вегIти хабурти, повестуни, пьесаби ва назмурти кадерхурти «Адам-дешла умцла», «Жавгьар», «Зиланти», «Къяб­бердибси гьуни», «Кьисмат», «Чер­дикIибти», «Урши», «Сабирхъулра суб­хIян дусмала дила», «Заманала гьигь», «Хабурти», «ГIямрула дякьличив», «Дила ши — Меусиша», «Ну акIубси бархIи» би­кIути жузи дурадухъун. 2017 ибил дуслизиб писательли урус мезличил сунела повестунала ва хабуртала «Ме­рило человечности» бикIуси жуз дураиб. Меусишала школализиб Расул Му­сае­вичли «НикIа литератор» би­кIуси ав­торская школа абхьибсири ва бу­за­хъусири. Илала бучIантала произ­ве­дениебала «Савлила шала» бикIуси жуз­ра дурабухъунсири.
Гьалабван Р.М.БяхIяммадовла «Тарихла бикьруми» бикIуси жуз дурабухъун, сунезира очеркуни ва 2016-2019-ибти дусмазир делкIунти гьанбикуни кадерхахъурси. Илдазирад цацадехIти газета бучIантас гьаладирхьехIе.

ХЪУМХIЕРТУТИ ГIЯХIЯЛДЕШ
Фольклор бучес гьар-гIергъили да­хъал шимази вашухIели, гьарил шила хасдеш багьес вирулри: гIяхIяйс гьунибаъни. Дила ишгъуна пикрира бакIиб: ши шагьарличибад сецад гьарахъли ва ахъли дубуртачиб биалра, илабти адамтала къиликъуни гIяхIти сари, гIяхIялла халаси хIурматбирули саби, цаличи цала диги имцIали сари, яхI-хIяя умути сари. Иличибли наб гьеч бурес дигули ахIенра шагьарлизибра, шагьарлис гъамти шимазибра илдигъунти адамти къаршихIебиркур или. Бирар илабра сецад-дигара гIяхIти адамтира. Гьанбуршис ца мисал: 1959 ибил дус, июль баз. Хайдакьла районна Мажалисла шилизиб адамтази хьарбаира, халкьла хабурти гIяхIил далуси ишав чи лева или. Почтализив узуси МяхIяммад бикIуси лев или буриб. Илав набзи чеваахъиб 40 дусра-сера виубси адам. Иличи дугьаизурли, дила мурад бурира. Илини малхIямли иб:
– ХIерибиули саби. Хъули аркьехIе.
Илдала хъулри Мажалислизивад ну­шачивяхI лявкьуси гьунила чедибси къатIлизир сарри. Гьаргалар нушаб гьунираиб илала неш. ХIералуси адам набчи пишряхъили гъамриуб:
– ВакIирив, гIяхIял, — иб ва дила някъ цIацIабариб. ГIур жаняхIлизи хили гIянала, тIас ва шинни бицIибси гажин кадихьиб.
— БуцIаси бархIи сабли кьяшми демжурли дургарну, кайили дирца. Динди набзи диха, ицис, — иб илини.
— Ягъари, неш, ну багьандан инжитмарирудгу.
— Вари, вари, дила урши, чердати динди, диха набзи.
Чердатурли дедес чебуркъуб. Кьяшми дирцира. Илини динди бусягIят дирциб, деръахъес даршиб. ГIур жаняхIлизибси столличи кьацIра, нусира, чяйра кадихьиб.
– Гьунчивси адам гуширусину, кьацI­ла чIямбара. ГIур хIела мурад бирехIе, – жагали гъайрухъун ил.
Шимазиб къаршибикиб беркайчил наб халаси хIурматбирути адамти, коньякуни булан кадихьибти. Амма илдалаван ахIи, баягъи иш рухънала дяхIла шаладешра баркьудира имцIали гьандиркули сари.
АхIерти гьалмагъуни, гIяхIяйс бегI гьа­лаб гIягIниси хъа вегIла дяхIла ша­ла­деш саби! ВегIли валусиличи ацIиб­хIе­лира, шкафлизирти ваяхI гIя­си­си ганзли зердикIахъути хьунул адамтира бирар. Ил – мурул мучлаагарируси хасият саби, муруй заманаличиб «чебаэс» гIягIниси.
ГIяхIяйс дяхIла шаладеш дерхъаб!

ТАМАНХIЕБИУБСИ «ЛЕКЦИЯ»
1984 ибил дусла гьала гIебшни. Ну совхозла парткомла секретарьли КIи­шав узулри. Нушала районна райкомпартияла хIябэсил секретарь Мажидла ГIямарли набчи зянкъдяхъиб:
— КIишала уди шилизибси сагали бариб­си школала юрт кьабулбарес, Мя­хIяч­къа­лализибад бакIибти хIян­чи­зар­тира нушара ляркьулра. ХIерейс дукес беркала ба­рахъес Меусишала сельсоветла испол­ком­ла председатель Муса Сулайбановлизи бура. Яра школала ди­ректор ГIяб­дул­кьадирлизи барахъес бура.
БакIиб илди ил бархIи. КIел «Виллис» ди­цIили адамти лебри. Илди-ургаб лебри об­компартияла хIянчизар урус хьунул адамра, нушала райисполкомла предсе­дательла заместитель ШяхIбан Чупановра, рай­компартияла секретарь Мажидла ГIя­мар­ра.
КIишала школа кьабулбарили, хIе­рейс нушала школа кьабулбарес да­кIира. Дайшарти къатIанала гьала са­да­ибхIели, шила исполкомла председа­тель Муса нушаб гьуниваиб. Нуни ил де­кIарварили хьарбаира:
— Гьу, хIерейс букахъес чичи букес пикрибарирая?
— Чиналра букес пикрихIебарира, — зямбизахъур илини.
Илгъуна аги биъниличила Мажидла ГIямарлизи бурили, нуни чебатурра:
– ХIуни ишди школа чебаахъес бука, ну дила хъули вякьи, хьунуйзи се-биалра беркеси хIядур­би­ра­хъис.
Хъули вакIирагу, балализир рархили хьунул раргира. Нуша ляркьнила илис гьандеш аги.
— Баари кьацIалра агара кьадин, — кьа­кьаракIиб хабчаб ва, къалаба-къа­ла­бали печьличи шанг чебихьили, ха­ла-ха­ласи диъ абушиб, гIур унрубачи кьацI­ли­чи дуцI­ру­хъун.
ГIяхIли школа кьабулбарес хIябилра жяв­ли бажардибикиб: ца сягIяталра хIе­ди­кили лералли, дила хъа гIела кIелра «Виллис» тIашаиб. Илдас гьуниваэс ну дуравхъунра. Беркала хIядурбарайчи ца­камсилра замана арбукьяхъес багьандан, ну бакIибти гIяхIлас «лекция» бучIес вехIихьира.
– Ишди хIябри, – ве­хIи­хьира ну, илдачи тIул бяхIчиаили, – нушала ши барайчи лер­ти сари. Мегъан шайх МяхIяммадли бурни хIясибли, ишаб леб алхунти МяхIяммад идбагла наслула 40 адам ва 100 шагьид. ГIурра хIярибихьили дурхъати адамти лебти саби. Ишди Ахъти хIябразиб ца цIелда леб 500 дус гьалаб катIунси, 40 цIелда катIи сари 400 дус гьалар.
ГIур нуни дила хъулрала гIелабад че­биуси ахъси Сутта дубур­личи тIул бяхI­чиаира ва иличила хабар бурес ва­ли­зуррагу, ШяхIбан Чупановли тIа­шаира: «ХIела лекция гIур белчIес батину, нуша гьала-гьала кьацIли дахес ар­дукаба».
Лебилра гIяхIли хъули абацIахъира. Ца игъбар – дила халаси хъалира, дай хъулиб журуга халаси столра, ил-алав даари утнира лерни.
ГIяхIли букес хIядурли хьалли, диъ белхьи бекIбиубли ахIенри. Хьунуй печьличи гидгури къалабали чедихьили, делхьахъун ва илдира, нусира, кьацIра гIяхIлала гьала, столличи кадихьиб. Нуни – жура-журала держести (гIяхIли ба­кIибхIейс хIядурли кадихьили, илди дила мурталра дирутири). Бара кьацIла чIямбарибхIейс дила ПатIиматли хинкI­ра сабаахъиб.
Гьар-се секIал далкадикиб. ГIяхIли хъу­либад дура­бул­хъухIели, баягъи обкомпар­тияла хIянчизар хьунул адамли, Па­тIи­мат­ли­зи иб:
— ХIед халаси баркалла: гIяхIил бажардирикади.
ДугIли ахIен халкьла бурала акIубси «Ур­кIи кабарцалли, чарх кабурцар» би­кIуси.

ДИЛА ДУРХIЯДЕШ
Дудеш вебкIибхIели, ну урегал дус виубли ургаси. Ил, Мусала БяхIям­ма­кьа­ди, акIубси сай 1876 ибил дуслизив, вебкIиб 1938 ибил дуслизив. ИтхIели ну­шала шила колхозла Тяшкечу хъарахълизи арши диршахъес шанти гуж-гужли арбикутири. Илаб дубурланти берхIила изайзи биркутири ва ил изайзибад бубкIутири. Неш, Зайнаб, дудешичир гIяхIцадла риштIаси рирусири. Ил арши диршахьес рурхьухIели, илис кьадин дудеш вашусири. Илав декIли зягIипикили, уркурличив хъули кибсири ва ца базла гIергъи вебкIибсири.
Шантани дудешла халаси хIурмат­би­русири, сенкIун ил малхIямси ва гIя­рабла гIилму дяркъурси вири. Ил кьадили узули, даргала шимазивцун ахIенну, дуравра калунсири.
1998 ибил дуслизив ну Мамедкъалализив хIе­ри­ру­си ХIусен бикIуси маллачи вякьунра. СенкIун адамтани нушачи, БяхIяммакьадила кулпетличи, илала шай­зирад мурталра саламти дихулри. Ил – нушала шилизив дудешли учIахъули калунси уил­ри.
– ХIела дудешли, – иб илини, – нешла мезван гIяраб мез дали…
1940 ибил дуслизив цаибил класс­лизи учIес керхурра. Шила школализив учIути дусмазив хасси багьудила вегI учитель хIейуб. Ит­хIели верхIел дусла школа бири. Ил нуни 1946 ибил дуслизиб таманбарира сен­кIун ца дусли делчIунра кIи­ибил ва хIя­бъи­бил класс. Ам­ма урус мез далули ахIен­ри. Или биалра, жагали учIес­­ра хIи­саб­ти ирзесра балира.
Алгъай някъ чулахъбиубли дургъбазивад чарухъунси ва учительли узуси дила узи ГIя­лир­захIяжини мас­ли­гIят­ба­риб Буйнакъсклизибси педучилищелизи керхахъес. Ну кьабуликира. БучIес бакIиб набчил барх школа белчIунти Зулайхала Мажидра Шамхила Рабазанра.
… УчIахъес гьуниввалту­хIе­ли, нешли ибси гьанбиркур: «Чевверхи набчивад». Нуни илала гъайла мягIна хIер­гъира. Селичивад чевурхусирал. Дургъбала гушти дусмазив велкъайчи кьацIли валхес хIе­риъни багьандан? БекIлил кьацIла бyтIa хIеби­кибти бурхIнира дири.
Нуша хIябалра дурхIя Мажидла дудешли, кьацIли дицIибти нушала таврумира эмхIечи кадихьили, Лаваша даахъира. Илар дехла машиналичи адиили, бархIехъ Буй­накъск шагьарла дублар кадацIира. Ну ит­хIели гьарли-марси дубурланван ве­гIи­ублири. Таврумира чекахъили, шагьарла кьа­кьакад хIябалра дурхIя датдихьира. Ну гьалав вашусири, сенкIун педучилище лебси мер хьарбаэс урус мез «гIяхIил далуси» сайри. Гьар цугикибсилизи нуни хьарбиира, «Где первое да­гестанское педучилище?» или. Педучи­ли­щела юртла халаси гIяйни дархьли дура­дикира.
1946 ибил дус. ЧебяхIси Ba­тIa дергъ­лис гIергъиси цаибил дус. Гушси дус. Училищелизи бу­чIес бакIибти лебилра бурцулри: имтихIян дедибти – цаибил курс­лизи, хIе­биубти – хIядур­би­руси курслизи. Урус мезла им­ти­хIянтачиб наб ударение се сабил бурахъес хъарбаркь ба­кIи­ли гьанбиркур. Нуни гIяхIил ба­луси саби или разииубли, «если ударяйт, ударение» ира, хIули липI­хIе­барили.
ИмтихIян дурабуркIуси учительницара кьанхIериуб: «Молодец!» – иб илини.
Училищела буфетлизибад карточка хIя­сибли нушаб кьацI лугусири, дуги-хIе­рилис 400 грамм. ХIуни ил дигалли хIябал бу­­­тIаличи бутIа, дигалли ца гьакIли беркен. Нуни хIябал бутIаличи бутIили, савли, хIерейс, бархIехъ букира. Иличил барх гIинц, капуста, нукьун – се-биалра биублира бири, хIебиублира. Илди гаши чекасес хIебиубли, нушала районнизибад бакIибти гъану шура дурхIя, илдала лугIилизиб дила кIелра юлдашра, гьаббухъи хъули арбякьун. Ца ну калунра, сенкIун «яхIбара, гьавмалхъад» или, даим узила кагъурти даши.
…Садаиб январьла каникулти. Буй­накъск­­лизибад МяхIяч­къа­лализи поезд башуси­ри. Или­чи кайили, МяхIяч­къа­лализи вакIира. Дугели илабад Бакулизи башуси поездла ганзухъуначи ацIили (билет асес арц аги), Мамедкъалализи ду­райкира. Ганзухъуначив вяр­гIиб­си набчи уркIецIидухъи дурги, кондукторли поездла ухIна ацIахъира. Игъбарлисван, дехла машина къаршибикили, xIepeйс Уркарахъи аира. Базарла бархIи сабри. Базарличи бакIибти рурсбани дила чемоданра касили, шилизи гьайварира.
Шила кьакьализивад ляв­кьу­хIели, цаибси юртлизив хьунуйчил узи xIe­ри­русири, итил юртлизиб – нешра рузира. Наб гьа­лабикили, рурсбани узила юртлизи ар­ку­­хIели, неш агни багьурра нуни.
– Неш ребкIибхIели, сен набзи хIе­ба­гьахъурра? – висивиили, хьарбаира нуни.
– БугIярси аргълизив xIy ва­кIес хIейруд или хIеба­гьа­хъурра, – иб узини.
Нешра дудешван «Тяшкечу»-ли ибгилри.
УчIахъес ну гьуниввал­ту­­хIели, нешли дурибти гъай ур­кIи­личир гьаннара лерал, «чевверхи набчивад» ибти. Балули рурги илини гIyp сунени ну чехIейъни. ГIе, тамашала пагь бедили саби Кьудратла ВегIли нешанала уркIбази! Уршбачи тамашала диги. ХIергъулра кьадин цацахIели нушани илди! Наб гибти вецIалра бархIи вашира ну итхIели нешла хIябличи, савлира бapxIехъра. Наб гьанарулри дергъла майдайчивси уршиличила децIлизирси нешла дай дугилизир биса ва Гитлерлис диргала. Гьанбиркулри нешли бемжализиб буцIуси бизиси кьацI. Гьандиркулри нешла къатавтар някъбани янила дугIярти дугурбазир делкIунти балала гьимиртазирад демхурти динди ва хъаткни кадихьили, фронтлизи дурхьути посылкаби, дургъби къалабали тамандиахъес Аллагьлизи балгни.
Леб вара дунъ­яличиб неш-ду­деш­ли­зивад мяхI­ру­ми­убси виштIаси дур­хIя­лай­чиб­ра халаси цар­хIил децI?! Юх, неш-ду­деш ми­цIир­ли лебалсини хIергъу ил децI.
Ил децIли вигубли чарухъунра ну педучилищелизи. ДецI­ра гашира цаван чархлизир дир­хули, белчIунсила мягIнара вайтIа иргъулри. Амма багьудиличи гъирали, яхIли гьар секIал дяхIярулри. ГIе, яхI цIакьси ярагъ саби. Цагьачам дила арц керхур, кьацI асес имкан аги. Керхурлири нукьунра. Общежитиелизиб барх хIербирутази тиладибарасри, арц яра беркеси луги. Амма нуни дила агиличила чизилра хIебагьахъурра, хIябал бархIи гушли уира. Авэсил бархIи хъулибад нукьунна тавра бакIиб. Ил бархьниличила кагъарлизиб багьахъурсирину, касайчи яхIбарира. Кафыр-Кумухла шилизивадси ХIясан Валиюллаевли хIяжланкIила декь хъулирад дихесиибну (ил набчил варх ца курслизив учIусири), нушани ярга-яргали биштIаси шанглар хинкIи диресдиира. Илкьяйда гIяхIла шайчибяхI нушала аги барсбиуб: кьацI, хинкIи, нукьун.
Буйнакъсклизив учIухIели, цархIил къияндешра лебри: каникултала замана шилизи лявкьухIели, Мамедкъала­ли­зив яра Берикейлизив по­­езд­личивад кайцIусири. Ила­бад нушала районнизи ма­шина хIебикили, урегцIали-верхI­цIа­ли километр хьурали ахъес чев­къулира бири.
1948 ибил дусла августла ахир. Педучилищелизи арукьес замана баилри.
Чилирил гIеббуриб, Серго­къа­лала педучилищелизи шу­рухъадли, хIед учIес ва вашес кункли бирар или.
Амма цаибил курсла студентла билет ахIи, набзиб цархIил документ аги. Сергокъалала педучилищела директор СягIид МяхIяммадовличи вякьунра. Студентла билетра чебаахъили, дила аги бурира. Ил дебали уркIецIичевси, гIяхIси адам сайли увухъун – кIиибил курслизи уцира.
Ишаб гьар шайчибад дила аги къулайбиуб: хIябалра аргъ педучилищела столоваялизир далхулри, учIес гьамадлири. Сергокъалализи вакIес — ару­кьес гьамадлири. Ишав ца иш­гъу­на секIайчира вяхIягира: шагьарла педучилищелизивад вакIибси нуни урус мез гIяхIил дала или, дарсла мягIна дарган мезли бурахъес набзи тиладибикIесбииб, хаслира рурсби. Сагати юлдашунала бирхауди марбарес багьандан, наб дебали гIяхIил учIес чебуркъуб. ХутIла шала агарли, дугурбазив учIес къияннири. Столла дайла верхIлихъла чирагъ кабихьили, авал-шел дурхIя дучIутири. Савли-жявли бурушлавад чуйнара улкьайличи хIерилзира, учIесли шалахIебиублира или. Шала пIякьдикниличил бурушлав учIи­ра. 1950 ибил дуслизиб би­ишигу викIулра, Сергокъалализи хутIла шала бакIиб.
Илди кьяркьти дусмазир пе­ду­чилищела студентуни-ур­гар гьарли-марти гьалмагъдеш ди­ри. Урусла ва даргала литературала дурсрачир, классла дурар делчIахъес, нушачи хъар­дирути жузи дахъал дири. Ил­ди лерилра делчIес нуша бажардихIедиркулри. ДелчIес бажардидикестигъунтачи ца-ца жуз хъардарили, алхIят бархIи цаладикили, вегIли белчIунси жузла бухIнабуц лебтазилра бурусири, къантIси белкI бирахъусири. Илкьяйда программализибси секIал балусири. Набчил барх бучIути машгьурти адамти бетаур: Ба­сир ГIялибеков (писатель, ДГУ-ла доцент), Ильяс ХIу­сейнов (писатель), Загьир Мя­хIям­мадов (филологияла гIил­муртала кандидат, профессор), ГIябдуряхIим МяхIям­ма­дов (ДР-ла урибси учитель, Из­бербашла педагогический кол­леджла преподаватель) ва цар­хIилти.
Педучилищела лебил­ра пре­­пода­ва­тельти бал­цIун­­ти­гъунти, гIяхIти ва тIа­лаб­кар­ти бири: Анна Николаевна, Мя­хIям­мад Кьадиевич, Мур­ту­за­гIя­ли Ражабов ва цар­хIил­ти.
1951 ибил дуслизиб гIяхIти кьиматуначил педучилище таманбарира.