ГIялимтани бурни хIясибли, дубурти азирти дусмазир ванзала дайларадли дурадухъунти вулкантала кумекличил детаурти сари. Иличирли дургар илди къатанадли кагибтира. Юртани делшес или дубурлантани къаркъа адилтIули чедаибти сари нуни. Къаркъала къатани ца журала хIедирар. Илдазирадли цадехI чIумати дирар, итдилти юртани делшес багаладирар. Амма лер газа яра кIатIа гачбикалли пашкайхъули, тIутIукадирутира. ХIерагу ца, чIумати къаркъала къатани мурхьли дубуртала удидяхI зуздитIи сари. Лер адитIес гьамаддеш алкIахъули, илцад мурхьхIедиубтира. Нуни илди къаркъала къатани залумти адамтала минала кьаманачил цугдурцули рирус.
Нуни иш белкI хасбарибси гIяшул къаркъаличил цугуцесил багьадур сай. Ил Дахадаевла районна КIишала шилизибадти Малайкат МяхIяммадовалара ГIябдуллагь ГIяхIмадовлара урши ХIяжи сай. Следовательли узуси сай. Апрельла бехIбихьудличиб ил багьадурла санигIятласи байрам саби.
ХIяжи ГIябдуллаевличил ну хабарагарли тянишриубсири. Следствие дурабуркIухIели, илини ну тилмаж сарливан жирарибсири. Ил уршила серхурдешли, бажардичевдешли, дагьричевдешли,… ну тамашариахъубсири. Чебаэслири илини сунечи хъарбарибси итмаданал ва чебетаахъили бекIбарес бажардивиркни. Илдигъунтас дубурланти бикIар: «БецIла хIулбазирадли цIа садитIес бажардииркуси».
Ил набзи мурталра урус мезли гъайикIулри, амма ну илала гъай хIясибли шакрикира ил дарган виъниличи. ХьарбаибхIели ил дила районнизивадси виъни белгибиуб. ХIяжи ибси дила узила уршилагъуна улира дила уркIи тамай иличи дила гъамсиличиван кабизахъур. Ил чеваибхIели, дила узила урши хIулбала гьалав вагьариубсиван билзулри, ва ну разидешла хIяланази гIелариркулри.
Гьамадли ахIенси бузерилизи ахъибси иличи хIеррикIули, нуни мурталра дигIяй тикрарбирусири: «Агь, хIу арали ват, хIябилра багьадур урши леври кьалли. ХIед ЧевяхIсини талихIли парчдикIути гIеркъати ва разити гIямрула дусми кьадардаркь…».
Иличила макьала белкIес или мурталра зянкърикIаси, амма илала набчил гьуниваэс ва сунечила баянти дурес замана аги. Ахирра илала санигIятласи байрам сабаибхIели, ил варгес кьасбарира. ИлхIелира кIишан уршиличил халкьсун ихтилат дураберкIес замана агарсили уббухъун. Ил багьандан саби иш дила белкIра сяйсили ва къантIсили бетаурси.
ГIяхIмадов ХIяжи ГIябдуллаевич акIубси сай 1994 ибил дусла сентябрьла 16-личив Ростовла областьла Боковский районна Красный Октябрь бикIуси шилизив.
1996 ибил дуслизиб ГIяхIмадовхъала хъалибарг чула хала бегIтала мер-мусаличи — КIишала шилизи чарбухъун. ХIяжи сунела шилизибти зилантачил варх 2000-ибил дуслизив учIес вехIихьибсири. Илабси дахъал шаликарси гимназиялизиб белчIуди хъараахъурли гIергъи, ДГУ-ла юридический факультетлизи керхур. ГIур 2016 ибил дуслизиб РФ-ла оборонала Министерстволизиб къуллукъбирули калун. Старший сержантла уличил хъули чарухъун.
— Дила виштIахIейчивадли гIядлу-зегъа далтахъути органтазив узес ва бархьдешгIевли кайзес ибси пикри лебсири. Ил пикри гIямрулизиб бетерхахъес багьандан кьаслизи кайзурра. 2017 ибил дуслизив МВД-ла Лавашала районнизибси следственный отделла следовательла къуллукъ бузахъес вехIихьира. Илав 3 дус узули калунра, — бурули сай ХIяжини.
Россияла ОМВД-ла СО-лизив следовательли узуси манзиллизив ХIяжи ГIяхIмадов сунела хIянчи ахъси даражаличиб дурабуркIни багьандан чуйнара шабагъатлаварибсири.
2021 ибил дуслизив бузерилизир дирахъути сархибдешуни пикрилизи касили, ХI.ГIяхIмадов ДР-лизибси МВД-ла ЧС СУ-лизи шурватурсири. ИлхIейчибадли илини Дагъистан Республикализибси МВД-ла следственное управлениелизибси экономикалашалси бетуцлизир цалабяхъибси кьукьяли дурадуркIути такьсирчидешла баркьудлуми белгидирнила шайчибси отделла старший следовательла къуллукъ бузахъули сай. Ил юстицияла старший лейтенант сай.
ХIяжи ГIябдуллаевич, хIела санигIятлашаси байрамличил бархбасахъи, республикала «Замана» газетала коллективли хIу уркIи-уркIилавадли мубаракирулри. ХIела, хъалибаргла, гъамтала ва шантала гIямрулизир чIянкIли гьарбизуни ва чедибдешуни дираб, арадешра талихIра гьарилла даимти дархкьябили дираб, хIу бузерила ганзухъуначивад мурталра ахъикIаби, хIечи хIилнабиркьули хIела бегIти-тухумтира калаб. Дерхъаб хIела гIямру, цIала тIякьгъуна, дубурлан урши!
