Рурсилис гIяхIси бяркъ бедибси, машгьурси дагъистанлан Гулизар ЯряхIмадовачила макьала белкIни багьандан, «Илала у – хьунул адам саби» ибси лебил Россияла журналистунала конкурсличир бутIакьяндеш дарили, «Преодоление» номинациялизир хIябъибил мерличи лайикьрикили сари «Дагестанская правда» газетала редакцияла хIянчизар Хасайбат Меджидова.
Мартла 23-личир Москвализир Россияла хьунул адамтала Союзлизир Х.Меджидова шабагъатларариб.
ГьанбиркахъехIе, конкурс 2021 ибил дусличибадли дурабуркIуси саби. Ил бяхIчиаибси саби ишбархIила манзиллизир халкьлизи мягIни-хIял далахъути бетуцуназиб хьунул адамла сипат гьалабяхI башахъниличи, Россияла, регионна хьунул адамтала Союзличи пикри имцIабирниличи.
Илгъуна чедибдешличил «Замана» газетала коллективлира Хасайбат уркIи-уркIиларадли мубаракрирехIе. Илис чархла арадеш, хъалибаргла балгундеш, гIямрула талихI ва гьаннала гIергъира бузерилизир гьарбизунира чедибдешунира диаб.
Мурталра санигIятлашал гьаларяхI рашуси
- Автор ПатIимат Кьурбанова Сурат — Юлия Трубниковала
- 30 марта, 2023. Четверг 09:05
- ||||
Дарганти-ургаб гIергъиси замана журналистикализир гIяхIти сархибдешуни дирахъути жагьилти лебни дигеси саби. Гьайгьай, гьамадси ахIен журналистла санигIят бузахъес. Мурталра къарауйчивси солдатван чекайзурли виэс хIяжатси сай ил. ГIе, журналист улкала халкьлизи мягIни-хIял далахъути органтала умутчевси солдат сай. Чинаб сегъуна гIяхIси анцIбукь кабикилил, лайикьти адамтачила къантIси манзиллизиб макьала балкьаахъес хIяжатлил, хъарбаркь хIясибли архIяличи дуравхъес гIягIнилил,… ил, бикIуливан, хIяралаб хIярхIяван хIядурли вируси сай. Илгъуна хIейалли, илала сархибдешунира хIедирар. Сунени бузахъуси санигIятличи гIяхIил хIядурриубхIели ва чекаризурли рузухIели сари дарган рурси Хасайбат Меджидовара мурталра гьаларяхI рашуси.
Фотографии с маркировкой
