Хайдакьла районна ГъярацIан шилизивадси, взводла командирла заместитель Ибрагьим Мирзаев, Украинализиб дурабуркIуси дявила хасси балбуцлизир Россияла Федерацияла пачалихълати хIяжатуни ва ВатIа хъархIерагардеш далтахъули, гъабзадеш ва урехиагардеш дакIударни багьандан, Суворовла уличилси медальличил шабагъатлаварили сай.
Ибрагьим Мирзаевли Нижегородская областьлизиб танкабала дивизияла инженертала-сапертала ротализив взводла командирла заместитель сайливан къуллукъуни ахъибтири. Дявила хасси балбуцлизир цаибти бурхIначибал бутIакьяндеш дирули калун. Харьковская областьла Изюм шагьарлизив, къуллукълати мурадуни ирзухIели, декIли вяхъиб ва иличибли, балуй кьяш бузахъес багьандан, халаси операция чекасес ва арадеш чеункъбарес гIягIнибикиб.
Илала гъай хIясибли, ил левси штаб минометла фосфорличилти хIярхIубау бикилри.
«Взводла командирличил варх КАМАЗ-личир аркьулри, штабла мер-муса-алав минаби кадихьес или. Ну рульличиври, командир – мякьлав. Танкабала дивизияличи хIедаили лерай, нуша минометла фосфорличилти хIярхIубау дикира. Ну хапли шакикира ва машина тIашаира, командирра кабинализивад дураушили, нура тIяхIухъунра. Шел секундра хIедикили, машина тIярхъубадбиуб. Машина заманаличиб бархьбатес бажардихIедикибти диахIелри, нуша илар улхутири. Ванзаличи кайкибхIели кьукьала тIама аргъира, кIинайсцун шакикира кьяшла лига бячниличила. Гьала-гьала селра хIергъира ва илгъуна кьяшличил вецIал минутцадхIи дуцIикIули калунра, бархкьябала арадеш сен сабил багьес дигули. Илдигъунти аги-кьяйдализивси набчи мегьла бутIнира чегиб ва дяхъурби имцIадиуб, дила кьяш агарсиванри, вайтIа изулри. ХIярхIубала гьужум тIашаили гIергъи, лерилра дяхъи-хъаслизи дикибти нуша дявила госпитальлизи ардукира, иларад вертолетличир Белгородлизи, гIергъила бархIи самолетличир Москвализи даахъира. ЦархIилти кIел КАМАЗ цIали дигублири, дила биалли — тIярхъубадбиублири. Игъбарлисван, нуша мицIирли калунра», — буриб ургъанни.
Хайдакьланна гьунар илала командирли пикрилизи кахIесили хIебатур. РФ-ла Президент Владимир Путинна 2022 ибил дусла декабрьла 19-личибадси ХIукму хIясибли, Ибрагьим Мирзаев Суворовла уличилси медальличил шабагъатлаварили сай.
Ибрагьимлис вахъхIи арадеш сагъбирули калес чебиркур, кIинайс иличи цагьатIи операция хIерли саби. Илала гIергъи, ургъанна дявила къяйлизи, сунела юлдашуначи, чариэс кьас саби, ВатIан батахъес багьандан.
Хайдакьла районна бекI ГIялим Темирбулатовли сунела пикри аргъахъиб. Илала гъай хIясибли, цацабехIти бургъантала гъабзадешли нуша пахрули дирцIахъулра ва Россия сунела марти уршбала цIакьси хIерудилиуб биъниличи чIумали дирхахъулра.
«ВатIан батахъни — дурала пачалихъуназибад мяхIкамбарес гIягIниси улкала гьаларти сунела жавабкардеш иргъуси гьарил гражданинна чебла саби. Хайдакьлантани, Россияла цархIилти гIямзурбазибадти жагьилтани кьяйдали, хIурматчерли къуллукъуни дурадуркIули сари, ВатIа хIяжатуни далтахъули ва Украинала халкь миллатчибала вайси асарлизибад уцахъули. Нушала нарт Ибрагьим Мирзаев жяв-жявли сагъиубли дигулра!», — викIи ГIялим Темирбулатов.
