Дубурланти улкала хъархIерагардеш батахъес ва даршути гIямру диахъес багьандан, шанда баруван кабилзути саби. ХIяжатбикалли, илдани чула гIязизти жан буланра кьурбандиру. ИшбархIи ил анцIбукь марбирули саби Украинализиб бетурхуси Россияла дявила хасси балбуцлизир бутIакьяндеш дирути нушала цаванзалантани. ХIера, илдигъунтала лугIилизивадси сай Дагестанские Огни шагьарлизивадси Исрапил МяхIяммадовра. Сепайда, вебкIили гIергъи, ил Россияла Игитла уличи лайикьикиб.
Северный флотла командир, Россияла Игит, адмирал Александр Моисеевличил барх ургъанна хъалибарглис «Мургьила Зубари» медаль бедиб.
Исрапил Летифович гьарли-марли гIяхIси капитан, Северный флотла иртути ярагъла бригадала танкабачи къаршити ракетабала батареяла командир вири. Илала бекIдешлиубси дявила частьла бутIала бургъантани чула командир уруххIекIуси, адамдешла къиликъуни духIнарси адам виъниличила багьахъур.
Исрапил гъабзадешла бебкIали алхун. ВатIайчи дигиличил, гьарил дубурланни халаси хIурмат бирути дурхъати гIядатуни хьулчили дуцили, дакIударибтири илини игитдеш.
Россияла дявила хасси балбуцлизир бутIакьяндеш дирути ва игитдеш дакIудирути бургъанти гIибратлис гьанбуршули, чеалкIуси наслу ВатIайчи дигичебтили, улкала марти дурхIнили абикьес хIяжатли саби.
Нушала цаванзаланна устадешличилти баркьудлумани миллатчибала гIяхIцад техника, илдала лугIилизир танкаби ва пулемётуни, агардарахъиб ва дявила гьалмагъунала гIямру дерцахъиб.
ВатIайс марси урши ва сартан бецIгъуна чIумаси дубурлан айкьурси неш Магизат ШяхIбановнас, илкьяйдали ил мурталра гIевурцуси хьунул Зарина МяхIяммаевнас халаси баркалла биаб. ГIяхIгъабза Исрапил улкала тарихла игитунала бяхIлизи даимлис минавиуб.
Бархьли бурасли, дебали гIядабли саби нушала ургъанна бебкIаличила бикьес. ВатIайс кумек хIяжатбикибси замана, гIямрула хъи вавализибизурти жагьилтани чула гъабзадешла баркьудлумачибли вегIла мер-мусаличи диги ва мардеш чедиахъули сари. Россияла дявила хасси балбуц бехIбихьибхIейчибадли, цархIилти бургъантачил варх, И.МяхIяммадовлира улкала дазурби далтахъулри ва Украинала миллатчибазибад Донбассла даршути халкь азадбалтахъулри. Чедибдеш уркIилабли илини сунела жан кьурбандариб.
