Устадеш чедирцIахъули

Гьарил адам сунени чеббикIибси са­ни­гIят мурхьли бяр­къес ва ил цархIилтазира гIе­­­басахъес къайгъилизив виэс хIяжатси саби. Хаслира мугIял­­лимти чула дагьри ва ус­тадеш ахъдуцес, чеалкIуси наслу устадешличил багьуд­лу­мачи бегIбиахъес, илдас гIиб­ратчебси бяркъ бедес къайгънабиркьутили биэс че­биркур. Илкьяйдали мугIял­лимтала устадеш бел­ги­дир­нилис хасдарибти дал­ду­цуни ду­ра­дуркIнира ди­геси саби.

ХIера, районна админист­рацияла заллизиб Дахадаевла районна бекI Мя­хIяммад ГIяб­дулкьадировли совещаниела дазурбазиб, лебил Россияла «Дусла учитель — 2023» ибси конкурсла бутIализир чедирикибси мугIяллим ва призерти шабагъатлабирнила балбуц дураберкIиб.
Районна бекIли конкурсличила баянти гьаладирхьухIели багьахъур, ил санигIятлати устадеш ахъдурцнилис кумекли бетаруси балбуц биъниличила. «Илдигъунти конкурсуни дурадуркIалли, пагьмучебти учительти белгибирес ва илди шабагъатлабирес имкан­би­кIур», — викIи ил.
«ХIуша дахъал дусмазир дузулрая ва нушала багьудила бетуцла пахрули детаурлира. Хаслира хIушала бузерили саби нушала районна челябкьла белгибируси. ХIушани бучIахъути ва бяркъличи биркахъути дурхIнала някъбази биркуси сабину.
Багьудичебти ва къайгъичебти жагьилти руркънилис хIушаб баркалла балахъулра. ХIушани хIушала багьудлуми, цIакьани ва къайгъни дурхIни гьарил секIайзиб бажардичебтили, чучи саби бирхутили халабаахъес дяхIчиаилра. Школализир касибти багьудлумала гIяхIдешли илди гIямрулизиб чус лайикьси мер буцес бажардибиркниличи вирхес вирар. ИшбархIи вегIличи вегI вирхни ва къияндешуназивад гIелумхIелзусили виъни лебгIеб кьиматчебсира саби», — буриб МяхIяммад ГIябдулкьадировли.
ГIур муниципалитетла бекI­ли Шаласила школала урус мезла ва литературала учительница Марина Мя­хIям­мадовас конкурслизир чедирикнила диплом бедиб.
Призертала дипломти дедиб КIишала бехIбихьудла школала учительница Оксана Мя­хIям­мадовас, Кубачила школабала географияла учитель Ильяс ГIяхIмадовлис, Меусишала школала физкультурала учитель МяхIяммадзагьир БяхIяммадовлис ва Уркухъла дахъал шалубарси гимназияла учитель БяхIяммад Умматовлис.
Чула яргализиб педагогунани саби гIеббуцни багьандан районна руководстволис баркалла багьахъур.