Кьурбан Зул­па­­кьа­­рович Мя­хIям­­ма­дов 1917 ибил дуслизив Къуп­па­ла шилизив акIубси сай. Учи­тельла курсани таман­да­­рили, Къуппала ва Хъар­лябхъула шимазив учительли узули калун. 1939 ибил дус­лизив сай гIяхIъулали Фин­лян­­­дияличилси дергълизи аря­кьун. 1940 ибил дусла фев­раль­личиб 5-ибил сапёртала полкла 28 ибил батальоннизиб ургъанна хъябариб. Иличи от­­делениела командирла къул­­­лукъуни хъардариб ва сер­жантла у (звание) бедиб. Ил дус­лизивал ил офицер лей­тенант ветаур ва сапёртала вз­вод­­лис бекIдеш дирес ве­хIи­хьиб.

Лейтенант Кьурбан Мя­хIям­­мадовли лебилра зама­на­лизиб дергъла бегIлара гьа­­ларти мер-мусаличибти бур­­гъан­тала къяяназиб къул­лукъ­би­­русири.
1942 ибил дуслизив Дуб­ровка бикIуси ши багьанданси дергълизив «Гъабзадеш багьандан» медальличи лайикьикиб.
1944 ибил дуслизив Сан хIеркI ихъухIели, Кьурбан Мя­хIям­мадовли хIеркIла итил шайчи танкаби дурхьнилис бекI­деш дирулри. Илини 67 ибил гвардияла полкла танкаби ва бургъанти детахълуми хIе­диахъубли хIеркIла итил шайчи арбукиб. Илди танкабани ва бургъантани чумал ши ва Статув бикIуси шагьар азаддатахъур. Илар дакIударибти гъабзадеш багьандан, гвардияла лейтенант Кьурбан Мя­хIяммадов Советский Союзла Игитла уличи гьалаихьибсири. Амма илис игитла у хIебедили «Дергъла ХIунтIена Байрахъла» орден бедиб.
Дергъла авлахъ минабазибад умубарни багьандан, цархIилтира гьалабизуни агардарни багьандан кIинайсра «Гъабзадеш багьандан» медальличи лайикьикиб. Илини Гнезно, Лодзь, Влацлавск азад­д­а­­тахъни багьандан И.Ста­лин­на Баркаллала кагъуртира ка­сиб­­тири.
Влацлавск шагьар азадбалтахъуси дергълизив Кьурбан МяхIяммадов декIли вяхъиб, ва сагъвиахъес Буйнакъскла госпитальлизи вархьиб.
Дургъби тамандиубхIели, ил Къуппала шилизи чарухъун­. Иличи гIямрула рархкья ХIя­ти­катра лебилра тухумтира хIер­лири.
1946 ибил дусличивад ­ве­х­Iи­хьили, Кьурбан Мя­хIям­мадов даршуси бузерилизи ахъиб. Къуппала шила колхозла председательла, партияла ор­ганизацияла секретарьла­ хIян­чиличив узули калун. Дергълизив кIина вя­хъибси виалра, бу­зерилизив мурталра цаибтала къяяназив вирусири. Кьурбан Зулпакьаровичла уркIилизиб кьясдеш, гIямруличи разиагардеш, халаурхудеш, уктемдеш лебси ахIенри.
Кьурбаннира ХIятикатлира хIябал асилти дурхIя халабаахъиб. Илдалара 16 дурхIя леб, 40-лицад — илдачибад акIубтира. Илди лебилра хала дудешлагъуна асилси гьунчибад ганзбикIули саби.
Кьурбан Зулпакьарович МяхIям­ма­довла урши ГIяли 1948 ибил дуслизив акIуб­си сай. Игит дудешла у ишбархIи илини ахъли бихули сай. Илини арцла медальличил шко­лализиб белчIуди хъа­раахъур. Ленинградла га­мур­би дируси институтла Кас­пийсклизибси филиал таманбариб.
Гурьевск шагьарлизив политехникумлизив, шила хозяйствола техникумлизив преподавательли узули калун. 1981-1985-ибти дусмазив — ДПТИ-лизив гIилмула хIян­чизарли. ГIилмула ва ба­гьудила гIяхIцад пособиеби делкIун.
2023 ибил дус бехI­бир­хьухIели, ГIя­ли­ни рес­публикала БекI С.Ме­ли­ковла някъбазибад гIилмула ва багьудила сагакьянчидешла шайчибси республикала Грантличи лайикьли виъниличила балахъуси диплом касиб. Иличибли сунела дудешла у ахъли бихули виъни чеба­ахъиб.
Кьурбан Зулпакьарович МяхIям­ма­довла дурхIнани ва дурхIнала баркьибтаницун ахIенну, лебилра Къуппала шантанира чула игитличи пахрубирули саби.
Дергъличил, игитдешличил бархбасунси Кьурбан Зулпакьарович МяхIяммадовла гIямрула гьуни 2001-ибил дуслизиб таманбиуб. Амма илала игитдешла хабар халкь-ургаб гьаннара лебал. Калмыкиялизивадси журналист Артём Боровикли Кьурбан МяхIяммадов Советский Союзла Игитла уличи гьалавихьибти до­кументуни архивлизир даргиб ва иличила «Гъабзадеш, Адамдеш, Устадеш» бикIуси сунела жузлизи белкIун. Илис ишбархIира Къуппала жамигIят баркалла бикIули саби.
Шила жамигIятли гьалабихьили, Лавашала районна муниципалитетли Къуппала урга даражала школалис игитла у бедиб. Шилизибси музейлизиб ЧебяхIси ВатIа дергъла Игитла гIямруличила буруси хасси гIямзи акIахъубли саби.