Первомайсклизиб — футбол

ХIурматла футболла абзани диганти, ахIерти гьалмагъуни!
ИшбархIи хIушази бурес дигулра Къаякентла районна Первомайск шилизибси футболла шайчибси агиличила. Гъай гьаларла сархибдешуначила, ишбархIила агиличила ва, дигуси хIяз гьалабяхI арбукес багьандан, челябкьлализир дарес хIяжатти далдуцуначила сари.

Гьала-гьала тарихличила
Первомайсклизиб футбол гьар мурталра гIяхIси даражаличиб бири. Нушаб гIяхIил гьанбиркур «Каспий» командализибти хабардерхурти футболла хIязли биркьанти. Илдала лерилра сархибдешуначила лукIасли, арагIеб газетала бяхIяни хIедиур. Ит командали челябкьлала наслулис гIяхIси гъира-гьаликI (толчок) акIахъуб. Шилизиб футбол дебали дигуси хIяз саби. Бахъал жагьилти тапли биркьули саби ва ара-сагъти гIямру дуркIнила бетуц гIеббурцули саби. ИшбархIи вегIла гьунарти чедаахъес гIяхIти шуртIри ва имканти акIахъубли сари. Сепайда, нушала шилизиб чIянкIли гьанна саби футболла майдан лушес бехIбихьибти. Гьалар, тренировкаби дурадеркIес, Избербаш шагьарлизи дашутири. ДирхехIе, футболла майдан белши гIергъи, хIязлис хIяжатти цархIилти шуртIрира акIахъес имканбикIниличи.

Футболличила гъайдикIахIелли
Чумал дус гьалав нушала шан ва футболла хIяз дигахъан Заур БяхIям­маевли хIяз дигантала «Каспий» би­кIуси Лига акIахъубсири, сабира Избербаш шагьарла стадионничиб мерлабиубси. Гьаланачи ил абхьнилис хасбарибси абз дураберкIибсири, гIур, гьар дус, чемпионатуни дурадуркIули дирар.
Цаибил сезон ункъли бетерхахъес имканбакIибхIели, чемпионатличил дарх, Заур БяхIяммаевли Лигала Кубок багьанданти абзани дурадуркIесра вехIихьиб. Нушала республикала декIар-декIарти районтазирад командаби дашескадииб.
Лерилра илди авара чедиули, Первомайскла жамигIятли чула шила цаибси Кубок багьанданти абзани дурадеркIиб. «Марокко» бикIуси командали чедибдеш сархиб, сабира ахирласи хIязлизиб «Нигерия» бикIуси командалис гьалабикибси. ХIябъибил мер сархиб шила ДЮСШ-ла командали.
Ил футболла журала абзани дурадуркIес бурсидиубти нушала командабани 2022 ибил дусла декабрьличирра кIиибил Кубок багьанданти абзани дурадеркIибтири.
Абзанала фонд 120 азир къурушличи абикиб. Ил спонсортала кумекличибли цалабяхъибсири. Халаси баркалла багьахъес дигулра МяхIяммадсалам Мажидовлис, Шамил Мажидовлис, «ЗАНТ» АЗС-лис, «ЭКСПРЕСС» АЗС-лис ва «БЕНЗО» АЗС-лис, чулира футболла хIяз дигантала байрам бетерхахъес сурсатуни декIардарибти ва иштяхI-гъира ахъдиахъубти. Абзаназир бутIакьяндеш дарес дигути гехIел ко­ман­дали гIярзаби гьаладихьиб. Спорт­сментала лугIи 100-личибра им­цIа­лири.
«Развитие» бикIуси стадионничир сарри абзани детурхути. Турнир хIядурбарес ва дураберкIес багьандан, «Каспий» ЛФЛ-ла кьукья бузулри. Илис бекIдеш дирулри Заур БяхIяммаевли (Оператор — Азамат Эльдеров; режиссер — НухI ГIяммаев; арбитр РФС — Давуд МяхIяммадов; комментатор — Рабазан Рабазанов (Иш белкIла автор)).
Дус дикили гIергъи, «Нигерия» командали чус дигуси бариб, клубла Президент МяхIяммадхIяжи МяхIям­мадрасуловла икьалаличил гIяхIси команда цахIнабяхъес имканбакIиб, илдани лерилра чула гьунибаъниби чедибдешличил хъараахъур. «Саудовская Аравия» командаличибад ахирласи абзлизиб чедибдеш сархес имканбакIиб. ХIябэсил мер касиб шила кIиибил ДЮСШ-ла командали. Чедибдеш сархибси команда Кубокличил, медальтачил ва грамотабачил шабагъатлабариб.
Илкьяйдали чула гьунарти чедаахъибти футболистунира декIар­ба­рибтири: Муса ГIябдуллаев – хIязличи хIер­бикIутани декIарварибси; ХIя­жи Багьавдинов – бегIлара гIяхIси вратарь; Сулайбан Сулайбанов – бегIлара гIяхIси защитник; МяхIяммад МуртазагIялиев – бегIлара гIяхIси полузащитник; Ислам МяхIяммадов – бегIлара гIяхIси нападающий; Тимур ГIямаров – бегIлара гIяхIси жагьси тапли виркьан; Кьурбан ГIябдулмажидов – бегIлара гIяхIси къапулизи тап бархьиан; Шамил ХIясанбяхIяммаев –турнирла бегIла гIяхIсигъуна хIязли виркьан; Рабазан Ражабкьадиев – Первомайскла Кубок багьанданти абзанала гIяхIсигъуна тренер.
Шабагъатунала дурарад, спортсментас арцла премиябира дедиб.
Командабас шила администрациялира чула шайзирад савгъатуни дедиб. Шила бекI Муса Кьурбановли, илкьяйдали Исматулла ХIясановли тапличил хIязта виркьусила дабри, тапани, грамотаби ва халаси торт савгъатдариб. Чедибикибси командала футболистунас предприниматель Ибрагьим Шахкарамовли сунела шайзибад сагаси форма бедиб.

ГIур-гьатIи се буруси?
Мерличир дурадуркIути абзанала дурарад, Первомайскла шила халатала футболистунала командали «Каспий» ЛФЛ-ли дурабуркIуси турнирлизирра бутIакьяндеш дирули сари.
«Каспий» бикIуси футбол дигантала Лигали биштIатас хасбарибси кьукьяра акIахъубли саби. Камил НухIовли бекIдеш дируси биштIатала кьукьяли ил Лигали дурадуркIути абзаначир жигарла бутIакьяндеш дирули сари. Илдани гIяхIти хIясилти чедиахънилис бикьридеш дирули сари илдани касибти меранани. ДурхIни гIеббурцути ва мурталра кумекбарес хIядурти предпринимательти Кьурбан Рашидовлис ва Тимур БяхIяммаевлис баркалла багьахъес дигулра. Илдани дурхIнала команда лерилра хIяжатти ваяхIличил ва палтар-кьяшличил гIеббуциб.
30-йчиб имцIали дус биубтала командара гьанбушес дигулра. Капитан Кьурбан МуртазагIялиевла бекIдешлиуб илдани Первомайсклис декIар-декIарти абзаначир вакилдеш дирули сари. Ил командали районна гьалабдеш багьанданси абзличибра чедибдеш сархиб.
Баянти кайули, гьалмагъуни, бурес дигулра: Первомайсклизиб футбол «мицIирли» саби, нушаб ил бекIлибиубсира саби. Леб адамти ва организацияби спортсменти гIеббуцес мурталра хIядурти. Гъай агарли, леб цIакьти жагьилтира. ХIебиалли, хIерли дирехIе сагати чедибдешуначи.