Декабрьла 27-личиб нушала улкализиб адамти уцахъантала БархIи дурабуркIуси саби. Адамла жан дерцахъес – иличиб хIялалси хIянчи чинаб лебси? Набра кьадарбиуб ил кабизлизиб хIянчи барес. ВецIал дус ну МЧС-ла пресс-службализив узули калунра. БехIемцIуни кадикибти ва цIадикибти чумра мерличи вякьунсири, тIабигIятла хьулчиличир детаурти гьанагарти балагьуни агардарес адамти уцахъантачил варх чуйнара музаухъунсири. Набчи хъарсири илдани бируси хIянчила видео касес, жамигIятлизи иличила балахъес. Нушала хIянчизарти, чула жан ахIерахIедарили, сегъунти-дигара аги-кьяйдализиб бузулри.
ГIергъити дусмазиб адамти уцахъантала кабиз хIяжатси техникаличил гIеббуцес ва сагати подразделениеби акIахъес багьандан, нушала республикализир дахъал хIянчи дурадеркIили сари.
ИшбархIилис Дагъистаннизир чIянкIли адамти уцахъантала 16 подразделение лер, чузибра 300 адам бузути. Илди республикала декIар-декIарти мер-мусаличир мерладиубли сари, дахъалгъунти — диркьала, урхьула дублар.
МяхIячкъалализир, Каспийсклизир, Избербашлизир лерти адамти уцахъантала кабизунала юртани ишбархIила тIалабуначи далдикахъили, ва хIяжатси техникаличил гIердуцили, сагадариб. Хасавюртла, Къизилюртла, Къаякентла, Къизларла, МяхIярамкентла ва ЧIярадала районтазир сагати юртани делшун.
2021-2022-ибти дусмазир адамти уцахънила шайчир гIяхIцад далдуцуни дурадеркIиб, чузибра 1900 адамлис кумекбарибти. Дебали къиянси аги кабилзули саби хIебла замана, адамти урхьначи ва шин лерти цархIилти мер-мусаличиб бамсриахъес дурабулхъухIели: куртIбикIес асухIебирути мераначи арбашухIели, держла бержили, шиннизи бухIнабулхъухIели. Ил шайчиб МЧС-ла хIянчизартани халаси къайгъи дакIубирули саби халкь-ургаб иргъахънила хIянчи дурабуркIули, хIялумцIлаби дарили, адамтани бамсриихъути мерани белгидирули, адамти уцахъанти агарси мерличив шиннизи ухIналхъусилизи урехиличила балахъули.
Илкьяйдали, гьундурачиб урехи хIебиахъес багьандан, дахъал хIянчи дурадуркIули сари ГИБДД-ла хIянчизартачил дархра. Янила замана яра цархIил къиянси агилизиб адамти уцахъанти ил мерличир къараулбирули, тIашли бирар.
Лебилра ил кабизлизиб бузути пергер дубурланти санигIятлашалси байрамличил мубаракбирулра, хIушала гьамадли ахIенси хIянчилизир гьарбизуницун диубли дигулра!
