«Дагъистан» РИА-лизив ДР-ла берк-бержла продуктунала ва шила хозяйствола министр Мухтарбий Аджеков журналистуначил гьуниваиб.
Министрли буриливан, ишдус гIяхIцад сабухъуни дучили сари, хаслира биринжла. Илала дурабад, биринж хIядурдирути заводунала лугIи имцIабиахънила хIекьлизирти хIянчира дурадуркIули сари.
«ГIергъити дусмазир республикализир биринж хIядурдирути 3 завод дузесаиб. Иличибли биринж республикализирад дурала улкнази дихнила баркьуди жигарчеббиубли саби. Гьалабванра Къизларла районнизибси «Мареновский» ООО-лизиб биринж хIядурдируси завод абхьиб. Илар 250 тонна биринжла хIядурдарес имканбикIули саби», — викIи М.Аджеков.
Илкьяйдали мицIираг адилкьнила кьяли гьалабяхI арбукьниличилара буриб М.Аджековли.
«Арбякьунси яни кьяркьси хIебиънили, республикализиб, ургабил хIясибли, 98 процентла кьадарлизир мукьри адикьес имканбакIиб», — викIи министр.
Техникалашалти дарсдешуначила гъайикIули, илини ишбархIилис гьаннала тIалабуначи далдикибти 272 шила хозяйствола техника асниличила буриб.
«ИшбархIила тIалабуначи далдикибти техника тIалабдарнили, машинабала-трактортала майда белшундеш гIяхIбухъахъес имканбакIиб. Техника 600,3 миллион къурушлис асибти сари», — багьахъур М.Аджековли.
Шимала хозяйствобала цахIнабик гьалабяхI башнили, республикалис пачалихъла хасси программа бетурхахъес ва грантуни сархахъес имканбикIули саби.
