Дагъистанна жагьилти журналистунала слётличи рукьниличи разириубра. Илаб «Орлёнок Дагестан» бикIуси газеталичил ва илаб бузути журналистуначил тянишриубра. ДурхIнас хасбарибси ил газетала 6600-ла кьадарлизиб тираж леб. ХIебиалли, газета кайсути 6600 дурхIяличицун ахIи, илдала гьалмагъуначира газетали гIяхIла шайчиб асар бирули саби. Газета бучIути дурхIнани телефоннизиб дугIли замана хIебуркIу, иларти хIязаназиб хIебиркьур.
ХIебелчIи лебалли, хIулбани чедибяхъибхIелира, газета белчIес дигесли балкьаахъурли биъни чебаэсли саби. Илар делчIес къиянхIедухъести, халали ахIенти макьалаби кадяхъили сари.
Ишдусла майла 31-личиб дурабухъунси газетализирти макьалабала уми делчIалли, багьесли саби селичила гъайбикIулил газета. «ДурхIни ахIерабирнила бархIиличил», «Аргъбаибсиличила ихтилат», «Жузала дунъялизи архIя», «Нушала Фазу пархрикIули ухусири», «Нуша чердиркIуси искусство», «Меусишавадси поэтла рухIла давла», «Нешагар вава» бикIуси литературала клуб, «Вавназирти хIеб», «Орлёноклис ахъси кьимат». Макьалаби чердикIибти ахIен, хIябал кIапIилизирад гьар-гIергъили касибти сари. Илдачи мешути, халаси мягIнала, делчIес гьамадти сари цархIилти макьалабира.
«Орлёноклис ахъси кьимат» бикIуси белкIлизиб «Замана» газетара гьанбушили саби. «Орленок Дагестан» ва «Замана» газетаби Россияла Федерацияла гьаннала заманала прессала «Мургьила фондли» гIяхIтигъунти сарливан чердикIили сари.
ДурхIни гIяхIла шайчиб бяркъес багьандан, газета бучIахъес лайикьли саби. Ил дуракайънилизир бутIакьяндеш дирути дурхIнала, гIулухъа журналистунала, духудешли, саберхурдешли, гIяхIла шайчиб бяркъурдешли, набчи халаси асар бариб.
Газета балкьарахъутани, илис макьалаби лукIутани, лукIес дурхIни бурсибирутани, чехIебиуси, амма дебали халаси хIянчи бирули саби или пикрирухъунра. Бирхаудичебли бурес вирар, илдани Дагъистанна дурхIнала челябкьла духуси ва гIяхIси бетарахъули саби.
Слётличир дахъал гIяхIдизести далдуцунани чучи пикри битIикIулри. Ила цалабикибти, лебилра цаван, бузерила сархибдешличила пикрибикIулри, уржибси халаси хъалибаргван сабри, чедихIяртли цалра вяшикIули ахIенри.
Илар нуни бегI гьалар чераибси газетала бекI редактор, даргала литература дигантани гIяхIли валуси Ильяс ХIусейновла рурси Басират Ильясовна ХIусейновани Басират Ильясовнала гIядатласидешли, халахIерерхурдешли, сунечила гапхIерикIнили уркIи ванара, шалара бариб. Чучила гап-чяхIбикIутани ахIен дунъяличи гIяхIдешла гье делгIути. Уктемдеш агарли бамсри хIебалули бузутани саби дунъя гьалабяхI арбикуси.
БегI гьалаб газета дурабухъунхIейчирад гъал дус дикили сари.
«Илкьяйда балкьаурси, дурхIнас хасбарибси ва гIяхIбилзуси газета регионнизибра цархIил агара», — викIулри, газетала коллектив мубаракбарес вакIибси Дагъистанна багьахънибала ва печатьла Агентствола бекI ГIябдуразакь ГIябдулвагьабович Жамалутдинов.
Илини ва гIилмула ва багьудила министрла заместительтани газетализиб бузути хIянчизартас, балбуцла бутIакьянчибас, илдала бузери кьиматлабирути лайикьти шабагъатуни дедиб.
Слёт ахъси даражаличиб хIядурбарилри. Дагъистанна «ЧIакала дурхIялис», ил ахъли урцахъес къиян кабирхьули бузути журналистунас, илдас кумекбирути лебилра жагьилти корреспондентунас халаси, шаласи челябкьла булгулра. Булгулицун ахIенра, илдигъунти дурхIнани ва илди бузахъес бурсибирутани челябкьла шаласи бетарахъниличи рирхулра. Илдала кьасани гьардизаб.