«ХIева сагаси гIяхIси би­рар, гьалмагъ — вахъ­хIила», — бикIули бирар дубурланти. Сецад дусми ар­дукьялра, школализир, цархIил бел­чIудила заведениелизир, барх­си бузерилизир дакIудиубти гьал­магъдеш бехъес хIейруси шанда гьаягъунти дирути сари. Замана арбашуцад илди гьалмагъдеш мурхь­дикIути ва дебадикIути са­ри.

Хайдакьлан рурси Сайгибат ГIяб­­дулкеримовара нура ДГУ-ли­зир­ дучIухIелил тя­ниш­­­диубтири. Нушала гIям­ру­ли­зир, пикруми-кьасаназир да­хъал цагъунти бетуцуни дурги, ил багьандан нуша тяниш­диуб­­ма­дан гьалмагъдикира. Я гьа­ча­­мал­ра цала цали уркIи бам­кье­­сил хIебарира. Дарх дучIу­ли­цун­ра ахIи, нуша ца хъулир хIерра ди­ру­ти­ри.
Сайгибат малхIямси ва дахъал гъай агарси сари. Ил илцадра белчIудиличи чекаризурли рири, хIятта дуги-хIери хIеили, ручIули чериаси. Ну кьалли тамашариубсири ДГУ-лизиб багьуди касили гIергъи, шила хозяйствола институтлизи ил ручIес карерхурхIели. Ил азгъиндеш хIедалуси ва бехI­­буцибси ахирличи бикахъес къайгънариркьуси рири. Наб или­зиб бегIлара гIяхIбилзуси къи­ликъри бархьдеш дигни. Гьар­ли-марси журналистла илгъуна бархь­дешла гьунира бируси са­би ва­ва­либирхъуси. Уктемдеш-ха­ла­деш агарси ва адамтачи дигили рицIибси ил санигIятлашал ахърикIнилисра илгъуна къиликъ кумекли бетаурсири.
Гьамадси ахIен кьалли дубурла шимази командировкаба­чира вашули, адамтала зугIлуми-челукьутира бекIдирули, дуги-хIери хIеили узес. Амма Сайгибат къиян­­дешуназирадли урухкIута­зи­­радси ахIен. Ил сунечи хъарбарибси ламусличил бирес бурсириубси сари.
Макьала балкьаахъес биалра илала санигIятлашалси баркьуди, илини типографиялизив чи-биалра хIейалри, илала мер бацIли хIебалти. Дигалли линотипла машина бузахъес бали илини, дигалли газета кабяхъес рирусири. КъантIли буралли, белкI барили гIергъира газета дурабухъайчи дирути лерилра хIянчи далутири илини. Илгъуна хIянчизарлис «мургьилизи ухъеси сай» бикIули бираргу. Ил редакциялизир рузни хайдакьла газетала къушумла халаси игъбарлизи халбарес вирар.
ГIергъиси замана Сайгибат Мирзаевнани поэзияла дякьличирра гIяхIти сархибдешуни дирахъули сари. Газетализив узуси адамла, бикIуливан, бекI ахъбуцес замана хIебирар ва дахъал хIянчи дирути сари. Амма Сайгибатли бузерила манзилла дурабси заманара заяли буркIули ахIен ва творчестволизир гьаларяхI рашули сари.
Гьалабван дила рахъхIила гьалмагъла сагаси жуз дурабухъни­личила баянти аргъибхIели, де­бали разириубра ва илгъуна мягI­ничебси анцIбукьличил ил му­баракрирулра. Дила ахIерси Сай­гибат, гьаннала гIергъира хIела кьалам бугабикIаб, бузерила сархибдешуни имцIадикIаб!
Сайгибатла «Дет­­хIейхъути дяхI­цIурби» би­кIу­си сагаси жузличил тянишбирнила балбуцра бетерхур Хайдакьла районна библиотекала читальный заллизиб.
Балбуцличиб лебри «Хайдакьла урунжуни» бикIуси жамигIятла цалабяхъла членти З.ХIясанова, ГI.Сулайбанов, ХI.ГIялиева, ХI.Мир­заев, П.Мир­заева, Г.ГIяб­дуразизова, Р.Мя­хIяммадова, Тарумовла районнизивадси поэт, писатель Абу Му­са Хизри Ди­дойский, Мажалисла МСОШ-интернатла бучIанти ва цархIилти.
Балбуцличиб поэтессала жузачил «Пикруми сегъунти-диалра гъайра илдигъунти дирар» ва «Хайдакьла урунжуни» ибти выставкабира далкьаахъурлири.
ГIяйшат Те­мир­­хановани халаси хIур­мат­ли­чил пайдаларикIуси хайдакьлан шя­гIирла гIямруличила ва творчестволичила буриб: «Сайгибат ГIябдулкеримова школализи рашули лерай ил назмурта лукIес рехIрихьибсири. Пагьмула кумекличил ил поэзиялизи умутличил рухIнарухъунсири ва сунела разидеш, пашмандеш иргъахъути белкIаначила уркIи бурули, бучIантачил лякьиррикIусири. Сайгибат ГIябдулкеримовани лерилра сунела гIямру дигуси газеталис харждарибти сари. Ил районнизир ункъли ралуси сари, илала халаси хIурмат леб. Сунела ВатIайчи диги, умуси уркIила дигIяндешуни илини бучIантас гьаладирхьули, рузуси сари».
Лебилра гъайбухъунтани Сайгибатла творчество ахъли кьиматлабариб ва ил халал хIярпличилси поэтесса сари или багьахъур.