Дагъистанна лите­ратура Фазу ГIяли­евала у агарли гьан­бикахъес дебали къиянни саби. СенахIенну, илала назмуртани 2-3 наслуличи халаси асар барили саби. Илала пагьмулизир дубурлантала гьав ва бекIахъуди нушани чедиулра.

Халкьла поэт Фазу ГIялиева, пагьмучерсили, уркIи гьаргсили, гIядатла ахIенсили рирусири. Марлира, ил дубурлан хьунул адам ва поэтцун ахIенри. Сари-алавси дунъя жагабиахъес, халаси пагьмура бедили, акIахъубси рурги ил Кьудратла ВегIли. Фазу ГIялиевала назмуртазирти хIялани, гIур чинаралра диэс хIедирар или гьанбикесли бирар илала произведениебачил тянишвирухIели.
Илди дурхъати, черяхIти пикруми сарри, багьалис асес, кирилис сасес, умцIули даргес хIейрути, ЧевяхIси Аллагьли илдас дедибти, марти дигайличила. Илдигъунти пикрумани, хIяланани сецад давлачердирулил, гьарил адамла рухI. Илкьяйда биахъес гьариллис дигахъули бургар, амма илдала назмуртазиртигъунти дигай гьариллис кьадардирули хIедургар. Кьадардиаллира, илданиван уркIи гьаргли, бахъ жагали, чула хIяланачила бурес бахъли бирули хIебургар. Фазу ХIямзатовнани, сунела творчестволичил, гьаннара бахъал адамтала уркIбачи, гIяхIла шайчиб асарбирули сари.
Илала бузерила гьуни 1950 ибил дуслизиб, школа таманбарили гIергъи, бехIбихьибсири. 1954 ибил дуслизир ил Дагъистанна хьунул адамтала педагогикала институтлизи карерхурсири. Илис гIергъи, Москвализибси М.Горькийла уличилси литературала Институтлизиб белчIуди даимбариб. Ил манзиллизир кадяхъибтири поэтессала цаэсти назмуртира, чулира бучIантала халаси пикри битIакIибти.
1962 ибил дуслизир Фазу ХIямзатовна сунела ВатIайзи чаррухъунсири ва Дагъистанна издательствола редакторли рузули калунсири. КIинайс биалли, «Дагъиста хьунул адам» журналла бекI редактор ретаурсири. 1994 ибил дуслизир илини Дагъистанна хьунул адамтала Союзлис бекIдеш дариб, 2006-ибил дуслизир биалли, ЖамигIятла палатализир рузес рехIрихьибсири.
Иличи че, Ф.ГIялиева СССР-ла писательтала Союзлизи карерхурсири ва Дагъистанна Миллатла Академияла академиклира рирули калунсири.
Дагъистанна халкьла пахрули бетаурси машгьурти адамтала бекIлибиубсигъуна кьукьялизи карурхуси сари Фазу ХIямзатовна ГIялиевара.
1971 ибил дусличирад рехIрихьили, Ф.ГIялиева Дагъистанна даршудеш балтахънила комитетла ва дунъяла Советский фондла отделениела председательли рирусири.
Ф.ХIямзатовна халкьла Гьалмагъдешла кIел орденничил ва ХIурматла лишанничил шабагъатларарибси сари. Илала халаси шабагъатунала кьанилизир, дурала улкнани дедибти дархли дахъал медальтира ордентира лер. Илди-ургаб гьанхIебушес хIейрар Святой апостол Андрей Первозданныйла орденра.
Фазу ГIялиевани 100-личирра имцIали произведение делкIунти сари. Илди адамтас дебали дигахъули ва гьаннара лебил дунъяла халкьли дучIули сари. Илкьяйдали дахъал, 1000-личирра имцIали, публицистикала макьалабира делкIунти сари илини.
Ф.ГIялиевала произведениеби 70 мезличи шурдатурли сари. Сунела ВатIайс марли, 83 дусла гIямруличир, 2016 ибил дуслизир январьла цаличир Фазу ГIялиева гIямрулизирад шалгIеррухъунсири.