Ургъанничи гьаввакIиб

Ишди бурхIназив ДР-ла Санкт-Петербурглизибси вакилдеш дируси организацияла руководитель ХIясан ХIясанов Украинализир дурадуркIути дявила анцIбукьуназир бутIакьяндеш дирухIели вяхъили госпитальлизи каркьибси Дибгашила шилизивадси лейтенант Амирбек Маммаевличи гьаввакIиб.

ХI.ХIясановли, гъабзадеш да­кIу­дарни багьандан, А.Мам­маевлис баркалла багьахъур. Урши жяв-жявли аравиубли, бегIтачи чарухъи дигниличила буриб: «Хасси балбуцлизир Дагъистанна багьадуртани чедиахъути игитдешличи лебтанилра пахрубирули саби. Илар, гьала тIашдатурти мурадуни гъабзадешличил тамандирули, хIушани бегIлара чихъти яхI-ламусла баркьудлуми дура­дур­кIулра. СанигIятлашалти устадешра гIиб­ратлати сари. Илкьяйдали хIушани нушала хала бегI­тала черяхIти баркьудлуми даимдирулрая».
Ихтилатла дазурбазиб, ХI.ХIясановли хьарбаиб ургъаннизи илала арадеш секьяйда сабил, сегъуна лечение дурабуркIулил, бегIтачил бархбас лебал, се-биалра хIяжатси лебал. Уршила документуначил дархдасунти далагардешуни лерни багьурхIели, ил шайчиб кумек гIеббаахъес чесиб.
Амирбекли сунела яргализиб багьахъур сай Дахадаевла районна Дибгашила шилизивадси виъниличила. Вузлизиб белчIуди хъараахъурли гIергъи, ил Северный флотлизиб къуллукъбирес вехIихьибсири. Украинализиб хасси балбуц бехIбихьибхIели, илини Донбасслизиб къуллукъбирулри. Илав вяхъибсири.
«С.М.Кировла уличилси дявила-медицинала ака­демияла специалистунас баркалла багьахъес дигулра. Илав сайри ну калунси бегI гьалав вяхъибхIели. ГIур халаси кумек гIеббаахъиб округла клиникала дявила госпитальлизибти хIянчизартани. Илкьяйдали баркалла балахъулра ХI.ХIясановлис ва цархIилти дила районна вакилтасра. Гьанна дила аги гIяхIбулхъули саби ва гъамли госпитальлизивадли дуравхъес хIядурикIулра», — буриб А.Маммаевли.