Иш суратлизибти хьу­нул адамти — Ахъу­шала районна хьу­нул адамтала Советла членти — дурабухъунти саби районна ад­министрацияла заллизибад, хьу­нул адамтала Советла за­се­дание дураберкIили гIер­гъи. Заседаниеличиб хIер­ба­рибси суал сабри Украинала мер-мусаличиб бетурхуси хасси балбуцлизир бу­тIа­кьяндеш дирутас ва илдала хъалибаргунас кумек гIеб­бурц­нила хIекьлизибси.

Районна хьунул адамтала Советла председательла заместитель ГIяйшат Чупановани, заседаниеличи цалабикибтала гьалар гъайрулхъули, буриб:
— АхIерти рузби! Нушаб хIяжатли саби Дагъистанна хьунул адамтала Советла Председательла дугьабиз гIеббуцес ва хасси балбуцлизир бутIакьяндеш дирутас кумекбирнила баркьудилизи нушала шайзибадра пай кабихьес. Гьарил шилизиб, нуша дузути коллективтазиб хIянчи бетурхахъехIе!
Заллизи цалабикибти хьунул адамтани ГI.Чупановала пикри гIеббуциб. ЦархIилван биэсра хIебири, —хьунул адамтала Советла членти, гIяхIцад дусмазиб хIянчи барибти, чебетаибти хIянчизарти ва халкь-ургаб хIурмат сархибти адамтицунра ахIи, — илди нешанира саби.
ГIяйшат Чупанова, МухIела шила администрацияла бекIла заместитель, шила халкьла масъулти гьунчидиркахънилизир чекаризурли рузуси, жа­мигIятла гIямрулизир жигар­ла бутIакьяндеш дируси, халкьлис манпагIятси бузерилизиб декIарбулхъути уршби-рурс­ба­ла нешра сари.
Чебетаибти хIянчизарти ва дурхIнас гIяхIси бяркъ бедибти нешани саби ил суратлизиб чебиути ХIинтIала шила администрацияла бекIла заместитель Зубайдат БяхIмудкьадиева, Бутрила шилизир илгъуна къуллукъличир рузуси ПатIимат НурмяхIяммадова, МухIела шилизибси библиотекала заведующая Гулбарият Рашидова, ЦБС-ла директор Жамиля ГIябдуллаева… Лебилра гьанбушес хIейрар, — суратлизибти хьунул адамтазир гапхIерареси цалра агара!
Сецад-дигара гIяхIти гъай дурес вирар районна соцзащитала управлениелизир да­хъал дусмазир рузуси Барият ГIи­саевачила. Халаси къай­гъи­биру илини сунечи дугьаизурси адамла къуллукъ бекIбарес, районна хьунул адамтала Советла члентазирадра бегIлара жигарчертазирад ца сари.
Суратлизиб агара биалра, гьан­бушес дигулра уркIи-хIял гIяхIти, гъай-мезлизи хIе­бар­­хили, чучи хъарси хIянчи бирути хьунул адамти — Усишала шилизирадси Муслимат Багъ­даева, ХIямшимарадси Ба­сират ГIялиева, Балхъарла ши­лизирадси Написат Идрисова, ГIялиханмахьилизирадси Ами­нат Жамалутдинова, Ур­хьу­­чимахьилизирадси Масай Мя­хIяммадова, МухIела шилизирадси Рукьият ГIяли­сул­тIа­нова, Ахъушала шилизибадти ГIяй­шат Ражабкьадиева, Зу­бал­жат Мирзаева, Зубайдат Бя­хIяндгIялиева, Хадижат Мя­хIям­мадова, Кьассагумахьили­зирадси Муъминат Аттаева, Цугнирадси Хадижа Шейхова, ТIантIала шилизирадси ГIяйшат ГIямарова ва бахъал цархIилтира.
Районна хьунул адамтала Советлис дахъал дусмазир бекIдеш дирули калунсири ГIябдуллаева ПатIимат Ами­новна, илала пасихIти дугьби, дугати масхурти гьан­хIе­­дикибси бархIи рахлира хIебирар.
П.ГIябдуллаевала къайгъни даимдарили бузуси районна хьунул адамтала Советлис ва Советлис бекIдешдируси Эльвира ХIясанхIусейновас дигулра нешанас къияндулхъути масъулти гьунчидиркахънилизир адамтала баркалла сархести баркьудлуми диубли!
Украинализирти дявила анцIбукьуназир бутIакьяндеш дирули саби нушала районнизибадти жагьил адамтанира. Илди-ургав лев районна хьунул адамтала Советла член, Шукьтила шила администрацияла бекIла заместитель Раисат МяхIяммадовала уршира. Аллагьли мяхIкамбараб саби ва лебилра ара-сагъли чарбухъаб чула нешаначи!