f ok v in t y        Версия для слабовидящих

Кумекбирес хIядурти

Дагъиста адамти уцахъуси ва ум­цIу­си Россияла МЧС-лизи кабурхуси отряд леб­ни­личила нуни бакьибсири. Ам­ма ил сегъуна мерличиб ва чи­наб сабил балуси ахIен­ри.

22 дек 2017 0 комментарий   МяхIяммадмухтар МуртузагIялиев
Дагъистанлантас де­ба­ли­ хIяжатбиркуси уч­реж­де­­ние­­лизи Россияла маш­гьурси адамти уцахъан Ни­­кIа­мя­хIям­­­мадов Зиявдин НикIа­мяхIяммадовличил варх ва­кIира. Ил МяхIячкъа­ла­ли­зи­бад гIяхIцадла гьарахъли, де­­бали жагаси урхьула дуб­ли­­чиб мерлабиублири. Рос­сия­ла МЧС-лизи кабурхуси Да­гъис­та ПСО (поисково-спа­са­тельный отряд) бузес бехI­би­хьиб­хIейчирад 25 дус диркули сари. 25 дус илдигъунти адамтас дебали багаласи уч­реж­дениелис дахъал дусми ахIен. Амма илаб дуги-хIери хIеили бузути адамти уца­хъан­тани ил учреждение Да­гъистайзибцун ахIенну, Рос­сиялизибра маш­гьур­­бариб. 1990 ибил дусла июльла 17-личиб РСФСР-ла Вер­­хов­ный Советла Прези­диум­ли «Россияла адамти уча­хъан­­­тала корпус алкIахъ­нила хIекь­­­­лизибси» хIукму кьа­­бул­­­­­ба­рибсири. Декабрьла 27-ли­чиб ил акIахъуб­сири. 1991 ибил дусла ап­рель­ла 17-личив ил кор­пусла пред­седательли С.Шой­­гу ка­тур­сири. 1992 ибил дус­ли­з­ир биалли, Рос­сияла ре­гион­­тазирра респуб­ли­ка­лизир­ра Россияла МЧС-ла ПСС-уни (поисково-спа­са­тель­ный ка­би­зуни) акIа­хъуб­­ти­ри. Гьанна рес­пуб­лика­ли­зиб Россияла РСЧС-ла ка­биз­ли­зи кабурхуси МЧС-ла Да­гъиста ПСО бузули саби. Ил от­рядли 1987 ибил дуслизир Ар­мениялизир, 1991 ибил дуслизир Грузияла Цхинвал шагьарлизир мерс дакьунхIели адамти къиян-жапализибад берцахъес жигарла бутIа­кьян­деш дарибтири. Илкьяйда ил отрядли Чечентазир диубти цаибти ва кIиибти дургъбани дарибти зарулти агардарес, Дагъис­тай­зирра Кавказла цархIилти республикализирра адамти берцахъес чумра дал­дуц дурадеркIиб. Ил от­ряд­ла ца­лабяхъибси команда Рос­сияла альпинизмла ва адамти уцахъантала шел жу­рала абзаназиб чуйнара чемпион бетаур. Ил отрядла авал адамти уцахъан 2001-ибил дуслизиб 8414 метрла ахъси Лхоцзе дубурла бехI­личи абицIуси Россияла МЧС-ла Гималайлизиб дура­бур­кIуси экспедициялизи ка­би­­ка­хъиб­тири. МЧС-ла от­рядла пахру саби адамти уцахъантала коллектив. Бахъал адамтала гIямру дерцахъни багьандан, РФ-ла Президент В.Путинна хIук­му хIясибли, хIябал адамти уцахъаннис «РФ-ла ма­шгьурси адамти уцахъан» ибси у бедибсири. Илди са­би З.МуртузагIялиев, З.Ни­кIа­­­­­мяхIяммадов, Ш.ГIялиев. М.Жаб­­­­рагIиловлисра Ш.ГIя­лиев­­лис­ра биалли «Дагъис­та машгьурси адамти уца­хъан» ибси ура бедибсири. 55 ат­тестоватьбарибти адамти уца­хъан­тазибад 6 — халкьани-ургабси классла саби. ГIурилти биалли цаибилра кIиибилра классла адамти уцахъанти саби. Чуйнара нушала адамти уца­хъантала отряд де­кIар-де­кIарти замунтазиб Рос­сия­ли­­зиб бегIла гIяхIси от­ряд­ли­­зи халбарибсири. Адамти уца­­хъантала отряд мур­тал­ра ахъси даражаличиб би­ахъес багьандан, илдас гIягI­­­нидиркути гIергъити шуртIри лер: спортзал, куртI­би­кIу­си бассейн, скалодром, цIа дил­шахъантала вышка. Абзур дус илдани устадеш ахъдурцути сари. Сагати хасти ма­ши­набачил, инженерный тех­ни­каличил, куртIбикIути ва шин­на уди кабицIути гIягI­ни­ахъ­лумачилра гIеббу­цили са­би илди.

Разидешла
ахъдешличивси
Нуни мурталра бегIла дурхъаси ва адамтас хIяжатси хIянчилизи халбирусири тухтурла санигIят. Чилилра бейгIес хIейрар бебкIала кьялшубазибад тухтурла кумекличил берцахъибти адамтала лугIи. Амма, нуни пикри бяхIчихIеили, лебли буили саби, кахти къиян-жапализи бикибтала гIямру дерцахъес музабулхъути адамти. Ил саби Россияла МЧС-лизи ка­бурхуси Дагъистайзибси ум­цIу­си-адамти уцахъуси отряд. 25 дус гьалаб акIахъубси ил от­рядлизиб къуллукъбирули бузули саби Дагъистайзибадти ва цархIилти миллатунала адамти. Ил уржибси ва интер­на­циональный отрядлизив гьанна 24 дусцадхIи къуллукъбирули сай Лавашала районна Кьарракьядани шилизив 1949 ибил дуслизив акIубси Ни­кIамяхIяммадов Зиявдин Ни­кIамяхIяммадовичли. Ил та­­машала кьисматла адамличил гьалавван МяхIячкъалала Ре­дукторный поселоклизив тя­нишиубра. Илини, набчил вахъ­хIила тянишличил кьяйда, ванати яхши-хуш дариб.
Дагъистайзибси МЧС-ла ПСО мерлабиубли саби Мя­хIяч­­къалализибад 20-25 километрла гьарахъси «Караман» бикIуси мерличиб. Нуша ила Зиявдинничил гIянручI дакIира. Чебаэслири Зиявдинна илаб бузути хIян­чизартани сегъуна хIур­мат­­бирулрил. Адамти уцахъантала отрядла ветеран Зиявдин НикIамяхIяммадовла вяшикIниличи хIяздухъеслири (Машааллагь). 25-30 дус виуб­силайчи мешутири илала шикьатIала. ПСО-ла ванзаличирти адамти уцахъути хIер­би­рути ва бузути хъулри, ма­шинаби духIнайути гаражуни, хасти машинаби, спортзал, бассейн, ска­лодром, МЧС-ла му­зей – лерилра се­кIал чедаахъиб набзи илини.
Зиявдин НикIамяхIям­ма­дович Дагъиста МЧС-ла ПСО-лизи 1993 ибил дусла апрельла цаличив вакIибсири. 1974 ибил дуслизив ил Дагъистайзибси экскурсиябала ва туризмала областной советлизив инструкторли, радистли, контрольно-спасательный кабизла начальникли узусири. Армениялизибси Ленинакан шагьарлизир мерс дакьи дахъал­ юртани гъятIаибхIели, адамти уцахъути от­рядличил кумекбарес вякьунсири. 1991 ибил дуслизир Грузиялизибси Джава по­се­лок­­лизир мерс дакьунхIелира илабти адамтас къалабаси кумек гIебаахъесра вякьунсири. 1995 ибил дуслизив Северный Дагъистайзирра Калмыкиялизирра дахъал заб дарили лерилра мер-муса шинни дуцибхIели, гIям­­рулис урехи лебниличи хIерхIеили, вертолетличил 8 бялихъчи берцахъибтири илини. Каспийсклизиб къачагъунани юрт къяй­каибхIели ва Первомайсклизиб хIилла дура­беркIибхIелира жигарла бутIакьян­деш да­рибтири Зиявдин НикIа­мяхIям­­мадовли.
Первомайсклизир кадиркути дургъби ви­­­­деокамераличил касили, суратуни ка­дя­­­хъили республикала телевидениелизир че­­диахъутири илини (Ил гIямрулис дебали уре­хиласи хIянчи сабри). 1998 ибил дуслизиб МяхIячкъалализибси Пархоменкола ули­­чилси кьакьализиб ва 1999 ибил дуслизир Буйнакъсклизир юртани къяйкаибхIели, Кьа­­рамахьилизир ва Чабанмахьилизир дургъби диубхIели, Ленинкент ва Дубки по­селокуназир хлорли дицIибти цистернаби бехIемцIлизи дикибхIели, Зиявдин Ни­кIа­мя­хIяммадович, сунечил барх бузутачил, камси заманала ухIнав ила музаулхъусири. Чумра адамла гIямру урехилати анцI­букьуназирад дерцахъиб ил дарган гъабзани.
Дагъиста адамти уцахъутала къиянси хIян­чиличила Зиявдин НикIамяхIям­ма­до­вичли 30-цад полнометражный фильм касили сай. ЧIянкIли илала къайгъиличил ва бажардиличил бузерила ва дявила гьу­­нартала музей леб акIахъубли. «Россияла МЧС-ла кабизлизиб бегIла гIяхIси музей» конкурсличи гьалабихьибси саби ил музейличила барибси фильм. Зиявдин Ни­­кIамяхIяммадов «Халкьани-ургабси классла адамти уцахъан» ва «Дубуртала туриз­мала шайчивси спортла мастер» сай. Адамти уцахъули дурабуркIуси хIянчила мурхьти багьудлумира бурсидешра лерси адам виънилис бикьридеш дирули сари илини цаладяхъибти ва дураибти «Цаибси кумек гIеббиахънила шайчирти методикала насихIятуни» ва «ТIабигIятла гьанагарти анцIбукьуназиб адамтани се бирес гIягIниси?» бикIути жузани. 1998 ибил дуслизиб РФ-ла МЧС-ла министр С.К.Шойгуни Зиявдиннис баркалла багьахъурсири.
Илини студентуначил, школьникуначил къаршиикесра замана бургули вирар. Сунела къиянси, амма адамтала гIямру дерцахъес бируси хIянчиличила су­ра­тунира ки­нобира чедиахъу, тамашала анцI­бу­кьу­на­чила хабурти дуру.
Ил шабагъатлаварибси сай «Зараллизи бикибти уцахъни багьандан», «Россияла МЧС-ла ПСС-лис 15 дус», «Россияла МЧС-ла ПСС-лис 20 дус» медальтачил, «РФ-ла урибси адамти уцахъан» хIурматла уличил ва «Россияла МЧС-ла хIурматла лишанничил».
Акьуси замана НикIа­мяхIям­мадов Зиявдин ар­хIябачи вашар. 2012 ибил дуслизив ил халали ахIенси экс­педицияличил варх Непаллизирти Гималайла дубуртачи вякьун. 5774 метрла ахъси Рол­воллинг дубурла бехIличи ацIиб.
З.НикIа­мяхIям­мадов Аллагьли чархлизи чIумал арадеш, уркIлизи гъира, сай-алавти адамтачи ва тIабигIятличи диги хьурадарибси адам сай. 68 дус виубси дубурлай савли айзурхIели зарядка диру, гьар бархIи 5 километрличи дуцIулхъан, бассейннизив кур­тIикIар. Ну Зиявдинничил къаршиикиб­си бархIира ил кIел сягIятцадхIи бас­сейннизив куртIикIули калун. Бирару гьаннала жагьилти, Зиявдин кьяйда, гьар бархIи зарядкара дарили, 5 километр­личи дуцI­ра бухъи, кIел сягIятцадхIи куртI­ра ­би­кIес? МажахIят.
2014 ибил дуслизиб Россияла МЧС-ла хIянчизартала Байкаллизиб аттестация дура­бур­кIухIели, сунечиб гIяхIцадла жагьилти адамти уцахъантачил кроссличи дуцIухъунси Зиявдинни кIиэсил мер буциб. ГIурилти абзанала баянтира халдарили, илис аттестациялис «шула» кьимат кабатур. Турникличира Зиявдин кункли айцIур гьамадли уюнти диру. «Дила гIямрулизив гьачамалра ца бархIилра больницализи кайхьунси ахIенра. Урегна машиналичив бехIемцIлизира викибсира. Кьудратла ВегIли ну уцахъулра, мяхIкамирулра», — викIули сай Зиявдин.
Зиявдинни хьунул Зазачил барх кIел уршира кIел рурсира абикьур, халабаахъиб. ДурхIнала 8 дурхIяра леб. Баркат биаб. Илала урши Исламра адамти уцахъан сай. Уршила уршилисра ил санигIят чеббикIес дигули сай. Дебали дурхъаси, адамтас хIяжатси, баркаллаличи лайикьси хIянчи саби адамти уцахъанна. ХIурматла Зиявдин ва Заза! ДурхIначира дурхIнала дурхIначира хIулдуркIули арати ва разити гIямру деркIабая!

Цаибил классла
адамти уцахъан
70-цад адамлизибад цалабикибси МЧС-ла Дагъиста дебали уржибси, ум­цIу­си-адамти уцахъуси отрядлизиб даргантира леб. Мя­хIям­мадов Мурад Мухтарович МяхIяч­къа­ла­лизив 1974 ибил дуслизив акIубсири. Шагьарла школализив учIули 8 класс тама­наили гIергъи, Сергокъалала шилизибси СПТУ-лизи керхур. 1993 ибил дуслизиб ил та­­­ман­барибхIели, Мурад Мухтарович гIяр­мияла къяянази къуллукъбарес арякьун. ГIяр­ми­я­лизивад чарухъи гIергъи, УЧПРОМ-строй орга­ни­за­циялизив лацла устала хIянчи би­рули, илини сунела бузерила гьуни бехI­бихьиб. 1997 ибил дусла ноябрьличив Дагъис­тайзибси МЧС-лизи шурухъун ва илав шел дус узули калун. 2004-ибил дуслизив Мурад Мя­хIям­мадов Россияла МЧС-лизи кабурхуси Дагъиста умцIуси-адамти уцахъуси отрядлизи 2-ибил классла уцахъанна хIянчиличи катурсири. 2008-ибил дусличивад вехIихьили, Мурад Мухтарович ум­цIуси-адамти уцахъуси подразделениела начальникли узули сай. «Ну механизаторра, кIиибил разрядла­ слесарьра, физкультурала учительра сайра. Адамти уцахъантала шел журала спортла цаибил разряд, альпинизмала хIябъибил разрядра лер», — бара пишяхъили, бурули сай Мурад Мухтаровичли. 2005-ибил дуслизиб илини ДГПУ белчIи, чебяхIси даражала багьудира касибсири. УмцIуси-адамти уцахъуси хIянчила специалист сайливан, ил хасси журала «Промышленный альпинист», «Водитель маломерных судов», «Противопажарная подготовка» прог­раммаби хIясиблира хIядурикIуси сай.
Къиян-жапализи бикибти адамти уца­­хъухIели, МЧС-ла хIянчизартас чула гIям­ру­лис урехилати анцIбукьунира къаршидиркур. Гьачам ЦIунтIила районнизибси Сигода шила мякьлаб дубуртачирад ка­духъунти къаркъубани ГIяндила Койсу би­кIуси, багьбиубсиван къалабали кабухъунси, хIеркI­лизи машина убяхIбикилри. Илдас ку­мек­барес Мя­хIяммадов Мурад Мухтаро­вич адамти уца­хъантала кьукьяличил къа­ла­бали ба­кIиб­тири. Гъабзадешличил ва урехи­агар­дешличил вяшбикIути илдани кахси анцI­букьлизирад чумал адамла гIямру дерцахъиб­тири. Гьар бархIи къиян-жапализи бикибти адамтас кумекбарес Мурад Мухтаровичра илала юлдашунира 5 минутла бухIнаб бал­кьарути саби. Сунечил барх бузу­ти хIян­чи­зартани Мурад МяхIяммадовла халаси хIурматбиру. ПСО-ла руководстволи биалли, илала къайгъичебси хIянчи хIисаб­би­рули, чуйнара шабагъатлаварибси сай. Ил хъай­чикайчибси сай, кIел дурхIяла дудеш сай.

Юлдашунани хIурматбируси
Шагьнавазов Шагьнаваз Эльдарович МяхIячкъалализив 1967 ибил дуслизив акIубсири. Школализир 8 класс делчIи гIергъи, политехнический техникумлизи керхур. ГIур гIярмияла къяяназиб къуллукъбариб. Илад чарухъунхIели ДГУ-ла физический факультетра таманбариб. Альпинизмла спортла разрядра касиб.Дагъистайзибси МЧС-ла ПСО-лизив 1996 ибил дуслизив узес вехIихьибсири. ГIядатла адамти уцахъанна хIянчиличивад вехIихьибси Шагьнаваз Эльдарович дунъяла халкьани-ургабси классла адамти уцахъан ветаур. Уцахъантала отрядлизи вакIили гIергъи, дебали дахъал санигIятуначи ва техникала устадешличи бурсивиуб. 150-йна бехIемцIуни ва хабарагарти тIабигIятла анцIбукьуни детаурти мераначи ваиб.
Хабарагарти ва урехилати бехIем­цIу­нала асурти агардирухIели, къиян-жа­пализи бикибти адамти уцахъухIели, уре­хиагардешличил, гъабзадешличил ва хIяжатси тяхIярли вяшикIес балуси хIян­чи­зар сайлин декIарулхъулри ил.
2014 ибил дуслизиб ГIяндила Койсу хIеркIлизи машина убяхIбикили, машинала бухIнабти адамти уцахъухIели, Мурад Мухтаровичличил варх Ш.Шагьнавазовра левсири. Буйнакъсклизир, Каспийсклизир, МяхIячкъалализир къачагъунани хIиллурти дурадеркIибхIелира илини адамтас кумекбирули жигарла бутIакьяндеш дарибтири.
Юлдашунани, барх бузути хIянчи­зар­тани Ш.Шагьнавазовла халаси хIур­матбиру. Се биалра хIебалуси суалличил (хаслира жагьилти хIянчизарти) иличи дугьа­бизурхIели, Шагьнаваз Эльдарович мурталра кумекбарес хIядурли вирар. Илала жигарчебси бузерира, къайгъира, гъирара кьиматладирули, чедибти хIянчизартани чуйнара шабагъатлавариб. Россияла МЧС-ла михъирличи биршуси «Сархибдешуни багьандан» лишан (2001-ибил дус), Россияла МЧС — 15 дус» медаль (2005-ибил дус), «Россияла МЧС-ла хIурматла лишан» ва цархIилти шабагъатунира лер илала.
Россияла МЧС-лизи кабурхуси ПСО 25 дус биъниличила макьала белкIес дигули Шагь­навазовличи зянкъдяхъибхIели, илини МЧС-ла ветеран Зиявдин Ни­кIа­мя­­хIям­ма­дов­л­ичила белкIахъес мас­ли­гIят­бариб. Ил от­рядлизиб халатала ва цабехIли итдилтала хIур­матбирни чебаэсли саби. Шагьнаваз Эльдарович хамдеш агарси адам сайнира багьесли саби. ХIя­жатдеш биуб­хIели дубуртачицун ахIен Ш.Шагь­на­вазов айцIуси. Л.Якубовичла «По­ле чудес» передачала ахъдешличира ацIибсири ил. 2015 ибил дусла декбрь базли­зиб дура­бер­кIибси телевидениела передача­ли­зир бу­тIакьяндеш дарили, сунес бархьби­зур­си «Нива» машиналичил Дагъистайзи чарухъун­сири.
Илини гIямрула рархкья Гулжанатличил кIел уршира ца рурсира абилкьули са­би. ТалихIла гIямру кьадардиаб хIедра хIе­ла кулпетлисра, юлдаш Шагьнаваз Эльда­рович!
«Замана» газетала агьлули Россияла МЧС-лизи кабурхуси Дагъиста ПСО акIубла 25 дус биънила шадлихъличил ва чесабиуси Сагал дусла байрамличил уржибси ва цабалгунси коллектив уркIи-уркIиларад мубаракдирулра. Аратили, сагътили, адамтас хIяжатдеш лебси мерличир кумекбарес хIядуртили калабая!

Оставить комментарий

Последние комментарии

Новостные оповещения

Получайте новостные оповещения!

  • о чрезвычайных происшествиях
  • о политических новостях
  • о общественных новостях
Яндекс.Метрика Рейтинг@Mail.ru