f ok v in t y

Халкьанала цадешлис хасдарили

Октябрьла 29-личир Ахъушар Социалист Бузерила Игит Хамис Казиевала приз багьанданти халкьла цадешла БархIилис хасдарибти футболла абзанала цаибил бутIа дураберкIиб.


Абзани дурадеркIиб «Ахъушала район» МО-ла жагьилтала политикала, спортла ва туризмала управлениела; «Каспийгазсервис» ООО-ла директор, «Каспийск шагьарла» округла собраниела депутат Заур Казиевла ва «Цаси Россия» ВПП-ла Ахъушала мерла отделениела кумекличил. Илар бутIакьяндеш дариб Ахъушала, Усишала, Дубримахьила, МухIела, АметеркIла ва Нахкала 10 командали.
Хамис Казиева акIубси сари 1932 ибил дуслизир Усишала шилизир. Дербентлизиб педучилище таманаили гIергъи, Усишала дурхIнала юртлизир воспитательли рузули калун. 1951 ибил дуслизиб Казиевани Дагъиста учительтала хьунул адамтала институт таманаибсири.
1958 ибил дусличирадли учительницали ва директорли рузусири дубурлан рурсбала интернатлизир. 1961 ибил дусличирадли Усишала урга даражала школализир директор ретаур. Илини бекIдешдируси школа Дагъиста АССР-лизиб гIяхIсигъунали бетаурсири. СССР-ла Верховный Советла 1968 ибил дусла июльла цаличибадси ХIукму хIясибли, дурхIнас мурхьти багьудлумира гIибратчебси бяркъра лугнилизи халаси пай кабихьни багьандан Хамис Казиева ахъси даражала шабагъатличи лайикьрикибсири. Ил Социалист Бузерила Игитла уличи лайикьрикиб ва илис Ленинна орденра «Мирш ва кьякь» медальра дедиб.
ЖамигIятла гIямрулизирра жигарла бутIакьяндеш дирулри илини. ДекIар-декIарти органтази депутатли рикIибсири. СССР-ла Верховный Советла 8-ибил созывла депутатлира рикIибсири ил.
1980 ибил дусла мартличирадли Хамис Казиева рузусири ДАССР-ла Верховный Советла Президиумла секретарьли, 1990 ибил дуслизирадли – ДАССР-ла Верховный Советла секретариатла начальникли, СССР бехъубли гIергъи, Дагъис­та Верховный Советла (1995 ибил дусличирадли – Халкьла Собраниела) Аппаратла Руководительла заместительли рузусири. БусягIят МяхIячкъалализир хIеррирули сари.
Турнир ибхьухIели лебри «Цаси Россияла» ВПП-ла Ахъушала отделениела мерла исполкомла руководитель, жагьилтала политикала шайчибси, спортла ва туризмала управлениела начальник ХIясан ХIясанов; Ахъушала районна МФЦ-ла директор, ДР-ла Халкьла Собраниела де­путатла кумекчи Руслан ЯряхI­мадов; МяхIяммад ХIяжиев («Цаси Россия» фракция); жагьилтала политикала шайчибси, спортла ва туризмала управлениела начальникла заместитель Шамил Ризванов.
Районна руководствола шайзибадли ХIясан ХIясановли цалабикибти ва турнирла бу­тIа­кьянчиби мубаракбариб. «Иш­бархIила балбуц ца ити Ха­мис Казиевас хасбарибси ахIен. Ил Дагъистан Республикала пачалихъла ва жамигIятла машгьурси хIяракатчи сари. Илини лерилра сунела гIямру Ва­тIайс къуллукъличи каибти­ри. Хамис Казиевагъунти хабардерхурти дубурланти жагьилтас гIибратлира биэс хIяжатти саби. Районна лебилра жагьилтала шайзирадли илис арати ва духъянти гIямру дулгехIе. Тур­нирла бутIакьянчибази ишкьяйда бурес дигулра, спортли халкьани уржахъути саби. Ну вирхулра ишбархIи чула жагати абзаначил спортсментани хIер­бикIанти разибирахъниличи. ХIушала ахъси гьавра, арати гIямруличи гьуцIдешра кам­мадиаб», — буриб ХIясан ХIя­сановли.
Илкьяйдали саламтала дугьбачил цалабикибтачи дугьабизур МяхIяммад ХIяжиев ва Шамил Ризванов.
Абзани ибкьси ва бархьдешла агилизир детерхур. Мя­хIяч­къалализибадси судьябала бригадали лайикьси тя­хIярли чучи хъарси хIянчи бариб.
Арцла шайчиб халаси кумек гIеббаахъиб «Каспийгазсервис» ООО-ла директор, «Каспийск шагьарла» округла собраниела депутат Заур Казиевли, медицинала «Арадеш» центрла директор Кьурбан Кьурбановли, МяхIячкъалала администрацияла спортла, туризмала ва жагьилтала баркьудлумала шайчибси Комитетла председательла заместитель Арсен Рабазановли.
Абзанала баянти хIясибли, по­луфиналлизи дурадухъун «А­хъу­­ша», «Дубри», «Ахъуша (Дай­­ша)», «АметеркI» командаби.
Турнирла кIиибил тур ноябрьла шуличиб МяхIячкъа­лализиб бетурхар.
«Ахъушала район» МО-ла
администрацияла багьахънибала отдел

Администратор сайта. Начальник комьютерной базы.

                          Написать сообщение

Оставить комментарий

Последние комментарии

Новостные оповещения

Получайте новостные оповещения!

  • о чрезвычайных происшествиях
  • о политических новостях
  • о общественных новостях
Яндекс.Метрика Рейтинг@Mail.ru